ӨГЛӨӨНИЙ МЭНД!

Өнөөдөр 2025.02.14. Энэ оны 45 дахь өдөр бөгөөд он дуусахад 320 хоног үлдэж байна. Монгол эх оронд маань нар 08 цаг 00 минутад мандаж, 18 цаг 13 минутад жаргана.

Улаанбаатарт цэлмэг. Өдөртөө 5 хэм, шөнөдөө 18 хэм хүйтэн байна. Та хувцсаа тохируулж өмсөөд гараарай.

Өнөөдөр Гэгээн Валентины өдөр. Болгар, Хойд Македонид өнөөдөр Дарс үйлдвэрлэгчдийн баярын өдөр юм.

Энэ өдөр Германы кино найруулагч, зохиолч Александр Клуге, Их Британийн кино найруулагч Алан Паркер, Лихтенштейний ван II Ханс-Адам, Вьетнамын анхны сансрын нисэгч Фам Туан, Нидерландын Ерөнхий сайд Марк Рютте, Оросын дуучин Юлия Савичева, Аргентины хөлбөмбөгч Анхель Ди Мария, Данийн хөлбөмбөгч Кристиан Эриксен, Английн жүжигчин Фрэдди Хаймор зэрэг алдартан мэндэлжээ.

Энэ өдөр Монгол Улсын түүхэнд болсон онцлох үйл явдлууд:

2011 оны энэ өдөр хүрлээр цутгаж, засварласан Д.Сүхбаатарын хөшөөг төв талбайд суурилуулж эхэлжээ.

2014 оны энэ өдөр Засгийн газар Цэргийн насны оюутан залуус алба хааж, Үндсэн хуулиар хүлээсэн иргэний үүргээ биелүүлэх боломж бүрдүүлэхэд чиглэсэн "Оюутан-цэрэг" хөтөлбөрийг батлав.

2015 оны энэ өдөр Монгол Улсын Ерөнхий сайд Ч.Сайханбилэг Монгол Улсын гурван сая дахь иргэн Х.Монголжин охинд батламж гардуулжээ.

Энэ өдөр дэлхийн түүхэнд болсон онцлох үйл явдлууд:

286 оны энэ өдөр домогт өгүүлснээр, цэргийнхнийг гэрлүүлэхгүй байх эзэн хааныхаа тушаалыг зөрчсөн эмч, лам Валентиныг цаазалжээ. Валентин цаазлуулахынхаа өмнө сохор бүсгүйд захидал бичиж, бүсгүй эдгэжээ. Түүнийг шоронгийн харгалзагчийн охин байсан гэж домогт өгүүлдэг.

1950 оны энэ өдөр Москвад Зөвлөлт-Хятадын найрамдал, хамтын ажиллагаа, харилцан тусламжийн тухай гэрээг байгуулав. Гэрээг хоёр улсын Гадаад хэргийн сайд нар болох Жоу Энлай, Андрей Вышинский нар үзэглэжээ.

1992 оны энэ өдөр ОХУ болон Украины хооронд дипломат харилцаа тогтоов.

2005 оны энэ өдөр “YouTube” бий болжээ.

2011 оны энэ өдөр Бахрейн дахь бослого эхлэв.

2022 оны энэ өдөр Канадын Ерөнхий сайд Жастин Трюдо “Эрх чөлөөний цуваа” эсэргүүцлийн жагсаалтай холбоотойгоор улс даяар онц байдал зарлажээ.

Билгийн тооллын 17. Тухайн өдөр морь, нохой жилтнээ аливаа үйлийг хийхэд эерэг сайн ба бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр гэмтнийг шийтгэх, сүм дуганыг сэргээх, амилуулах, өглөгийн түллэг хийх, хишиг дуудуулах, хот балгадын үйл, цэрэг, цагдаагийн үйл, андгай тангараг, гэрээ, хэлцлээ буцаахад сайн. Гөлөг тэжээх, золиг гаргах, бомбын үйл, хүүхэд хөлд оруулахад муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод баруун урагш мөрөө гаргавал зохистой.

Өнөөдөр үс засуулбал  өнгө зүс доройтно.

Өнөөдрийн ажилд тань амжилт хүсье!