О.Баасанхүү хорих 461-р ангид очиж, хар тамхины хэрэгт холбогдсон охиныг эргэжээ

 УИХ-ын гишүүн О.Баасанхүү Г.Сарангэрэлийг эргэж очжээ.  Учир нь Г.Сарангэрэл охин гишүүнтэй уулзах хүсэлтийг удаа дараа гаргасан юм байна.  О.Баасанхүү “ Аавыг чинь зодсон ийм өмгөөлөгч авах хэцүү шүү дээ. Яаж энэ өмгөөлөгчийг олсон юм бэ. Чи нэгэнт л хар тамхи татдаг юм бол үүнийгээ бичээд өгчих. Ярьж байгаагаа бичээд өгчих. УИХ-ын гишүүн чамайг шоронд эргэж байна. Түүхэндээ анх удаагийн тохиолдол. Ийм юм хэзээ ч байгаагүй. Чи харин их азтай юм” гэжээ.

Харин энэ талаар Г.Сарангэрэлийн өмгөөлөгч Г.Батбаяр “Г.Сарангэрэл танилаараа дамжуулж надтай холбогдоод, өмгөөлөгчөөр авахыг хүсч байгаагаа мэдэгдсэн. Энэ дагуу би үнэгүй өмгөөлөхөөр гэрээ байгуулсан байгаа. Урд нь хэзээ ч хар тамхи татаж үзээгүй нь баримтаар нотлогдсон. Сарангэрэлийн хувьд гэмт хэрэг гарсан нөхцөл байдал, цаг үе, тухайн хэрэгт оролцсон оролцогчдын хэр хэмжээг сонсож ажиглаад дотоод итгэл үнэмшилдээ “Энэ охины гэм буруугүйг нотолж чадах юм байна” гэж би бодож байгаа. Шүүхээр гэм буруу нь тогтоогдоогүй байхад хүнийг мэргэжлийн хар тамхичин, мэргэжлийн биеэ үнэлэгч байсан мэтээр дайраад байгаа нь буруу. Бид Сарангэрэлийн нэр төр, алдар хүндийг гутаасан хэргээр О.Баасанхүүг шүүхэд дуудна. Гэм буруутай нь тогтоогдоогүй байхад олон нийтийн сүлжээгээр бичихээ болих хэрэгтэй. Өнөөдөр би найз залуутай нь ярьсан. Найз залуу нь ч их дарамттай байна.

Урьдчилан хорих 461-р ангид очиж, манай үйлчлүүлэгчийг дарамталж, янз бүрийн зохисгүй үйлдэл гаргаж, зохисгүй үг яриа хэрэглэж, шоолж инээн, дооглож тохуурхсан үйлдэл нь хэрэгт нөлөөлнө гэж өмгөөлөгчийн зүгээс үзэж байгаа. Хүсэлтийн дагуу очиж уулзсан байж болно. Гэхдээ би УИХ-ын Ёс зүйн хороонд ч өргөдөл гаргаж, түүнийг гишүүнээс нь эргүүлэн татуулна. Урд нь өчнөөн удаа хүсэлт гаргаад байхад очоогүй мөртлөө 10 тэрбумын асуудал гарахаар очиж байгаа байхгүй юу. МАХН-ын удирдлага Баасанхүүд арга хэмжээ авахгүй бол Захиргааны хэргийн шүүхэд хандана” гэжээ.