“Ард Кредит ББСБ”  4.9 тэрбум төгрөг татна

Монголын хөрөнгийн биржид шинээр бүртгэгдсэн “Ард Кредит ББСБ” ХК-ийн үнэт цаасны анхдагч зах зээлийн арилжааны захиалгыг эхлүүлсэнтэй холбогдуулан цан цохих ёслолын үйл ажиллагаа өнөөдөр боллоо. Арга хэмжээнд Санхүүгийн зохицуулах хорооны Үнэт цаасны газрын дарга Б.Лхагвасүрэн, Монголын хөрөнгийн биржийн Гүйцэтгэх захирал Х.Алтай, "Ард Санхүүгийн Нэгдэл" ХК-ийн Гүйцэтгэх захирал Ч.Ганхуяг, “Ард Кредит ББСБ” ХК-ийн Гүйцэтгэх захирал Ч.Ганзориг,  "Ард кредит ББСБ" ХК-ийн хувьцаа эзэмшигч, ТУЗ-ийн гишүүн С.Гэрэлтуяа, "Ард капитал групп" ХХК-ийн Гүйцэтгэх захирал Б.Өлзийбаяр нар оролцож, Монголын хөрөнгийн биржийн 5,912 дахь арилжааг эхлүүлэх хүндэтгэлийн цанг цохилоо.

"Ард кредит ББСБ" ХК нь 2011 онд үүсгэн байгуулагдсан, "Ард санхүүгийн нэгдэл" ХК-ийн хөрөнгө оруулалттай компани бөгөөд зээл олгох, цахим төлбөр тооцоо, мөнгөн гуйвуулга зэрэг үйлчилгээг эрхэлдэг. Тус компани нь зээлийн бүтээгдэхүүнийг санхүүжүүлэх зорилгоор нийт хувьцааныхаа 25 хувь буюу 70,000,000 ширхэг хувьцааг нэг бүрийг нь 70 төгрөг ба түүнээс доошгүй (70-85 төгрөг) төгрөгөөр олон нийтэд санал болгон худалдаалж, нийт 4.9 тэрбум төгрөг ба түүнээс доошгүй хэмжээний хөрөнгийг татан төвлөрүүлэхээр ажиллаж байна. Үнэт цаасны худалдан авах захиалгыг 2019 оны 2 дугаар сарын 18-наас 2019 оны 3 дугаар сарын 1-ний өдрийн хооронд Монголын хөрөнгийн биржийн бүх гишүүн үнэт цаасны компаниудаар дамжуулан хүлээн авах юм.