Татварын хөнгөлөлт ЖИНХЭНЭ ЖДҮ-чдийг дэмжих үү?

Улсын хэмжээнд татвар төлөгч 191 мянган аж ахуйн нэгж байгаагаас 95,9 хувийг бичил, жижиг аж ахуйн нэгж эзэлдэг байна. Тэгвэл Татварын багц хуулийн шинэчлэлийн хүрээнд эдгээр аж ахуйн нэгжүүдийн хөрөнгө оруулалт, бизнесийн орчныг дэмжихээр төсөлд тусгагджээ. Тодруулбал, жилийн борлуулалтын орлого нь 1,5 тэрбум төгрөгөөс бага бол төсөвт төлсөн татварын 90 хувийг буцаан авдаг болох юм байна. Тэгэхээр хуулиараа  Жижиг, дунд үйлдвэрлэл эрхлэгч гэх ойлголтод хамаарагдах аж ахуйн нэгжүүд энэ зохицуулалтад хамрагдаж, татварын 90 хувийн ХӨНГӨЛӨЛТ эдлэх тухай яригдаж байна.

ЖДҮ-ийг хөгжүүлэх сангийн хөрөнгө мөнгөний зарцуулалт жинхэнэ ЖДҮ-чдийг давж, нөлөө бүхий эрх мэдэлтнүүдийн хамааралтайгаар хуваарилагдсантай холбоотой сэдэв халуун хэвээрээ энэ үед бичил, жижиг аж ахуйн нэгжүүдийн төлсөн татварын 90 хувийг эргүүлэн олгох тухай асуудал чуулганаар хэлэлцэгдэх нь ээ.

Жижиг, дунд үйлдвэрийн тухай хуулийн 5 дугаар зүйлд  “Жижиг, дунд үйлдвэр эрхлэгч” гэдгийг тодорхойлохдоо:

• Үйлдвэрлэлийн салбарт  ажиллагчдын тоо нь 199-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий үйлдвэрлэл эрхэлдэг аж ахуйн нэгж, иргэн;
• Бөөний худалдааны салбарт  ажиллагчдын тоо нь 149-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий бөөний худалдаа эрхэлдэг аж ахуйн нэгж, иргэн;
• Жижиг худалдааны салбарт ажиллагчдын тоо нь 199-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий жижиглэнгийн худалдаа эрхэлдэг аж ахуйн нэгж, иргэн;
• Үйлчилгээний салбарт ажиллагчдын тоо нь 49-өөс дээшгүй бөгөөд 1 тэрбум төгрөг хүртэлх жилийн борлуулалтын орлого бүхий үйлчилгээ эрхэлдэг аж ахуйн нэгж, иргэн;
• Худалдаа, үйлчилгээ, жижиг үйлдвэрийн салбарт   ажиллагчдын тоо нь 19-өөс дээшгүй бөгөөд үйлдвэрлэл эрхэлдэг, эсхүл контракт, хөдөлмөрийн гэрээгээр ажиллагчдын тоо нь 9-өөс дээшгүй бөгөөд худалдаа, үйлчилгээ эрхэлдэг, 250 сая төгрөг хүртэлх жилийн борлуулалтын орлого бүхий жижиг үйлдвэр эрхлэгч аж ахуйн нэгж, иргэн байна гэж заасан байдаг.

Тэгэхээр Сангийн сайдын хэлж буйгаас үзэхэд татвар төлөгч 191 мянган аж ахуйн нэгжийн 95,9 хувь болох 183 169 аж ахуйн нэгж бичил, жижиг гэсэн ангиллын дагуу татварын 90 хувиа буцааж авахаар хуульчилснаар төсвийн орлогын тооцоололд ямар өөрчлөлтүүд орох вэ гэдэг асуулт мэдээж гарна.