Монголд гацсан казахууд Ерөнхийлөгчдөө хандлаа

Цар тахал эхлэхээс өмнө Монголд ирээд хөл хорионы улмаас Монголд гацсан Казахстаны иргэд Ерөнхийлөгч Касым-Жомарт Токаевд хандаж, эх орондоо харихад нь туслахыг хүслээ.

Казахстаны Засгийн газраас коронавирусний халдвараас сэргийлэх зорилгоор гуравдугаар сард гадаадын улс орнуудаас онгоц, автобус хүлээн авахаа больсон юм.

Монголд гацсан иргэдийн зарим нь гуравдугаар сараас хойш Баян-Өлгий аймагт байгаа гэнэ. Тэдний нэг Оразай Галымбекулы “Одоогийн байдлаар зуу гаруй Казахстаны иргэн Монголд саатаад байна. Ихэнх нь Баян-Өлгийд, хэсэг нь Улаанбаатарт байгаа. Гуравдугаар сард аав нас бараад би Монголд ирсэн. Казахстанд бие давхар эхнэр минь үлдсэн. Саяхан эхнэр төрсөн, харин би гэртээ харьж чадахгүй байна” гэж ярьжээ.

Казахстаны ГХЯ-ны хэвлэлийн албаны дарга Айбек Смадияров “Бид энэ талаар мэдэж байгаа. Монгол дахь манай Элчин сайд Жалгас Адилбаев Баян-Өлгийд очиж, тэдэнтэй уулзсан. Одоо манай Засгийн газар Монгол, ОХУ-тай иргэдээ автобус, онгоцоор хэрхэн авчрах талаар хэлэлцээр хийж байна. Баян-Өлгий аймгийн нисэх буудал зарим төрлийн онгоц хүлээн авах чадалгүй. Тус аймагт байгаа зарим хүн онгоцны тасалбар худалдан авах боломжгүй болсон гэсэн. Тэднийг автобусаар авчрахын тулд ОХУ-тай тохиролцох хэрэгтэй болсон. Тиймээс шийдвэр гаргахад хүндрэлтэй байна” гэж сэтгүүлчдэд мэдээллээ.