Хүрэл зэвсгийн үед талийгаачдын ясаар хөгжмийн зэмсэг хийдэг байжээ

Хүрэл зэвсгийн үед эртний британичууд талийгаачдаа санан дурсах үүднээс тэдний ясны хэлтэрхийг хадгалж үлдэх, хөгжмийн зэмсэг, сийлбэр хүртэл хийдэг байжээ. Археологичид Британийн нутаг дэвсгэрээс илрүүлсэн Хүрэл зэвсгийн үед хамаарах эртний хүн, амьтны араг ясыг судалсны дүнд талийгчдын ясыг урт удаан жил үе дамжуулан хадгалдаг байсан гэсэн дүгнэлтэд хүрчээ.

Бристолын их сургуулийн Томас Бутын хэлснээр, зарим булшинд талийгаачийг өөр хүний араг яс эсвэл ясаар хийсэн эд зүйлсийн хамт оршуулсан байжээ. Лабораторийн шинжилгээгээр, тухайн хүн нас барснаас хойш хоёр үе өнгөрсний дараа түүний ясаар хийсэн эд зүйлсийг үр хойчтой нь хамт оршуулдаг байсан аж. Уилтшир дэх Стоунхэнжээс холгүй олдсон булшнаас хүний гуяын ясаар хийсэн шүгэл олдож байсан бол Стоктон-он-Тис жижиг хотод илрүүлсэн нэгэн эмэгтэйн булшнаас түүнээс 60-170 жилийн өмнө амьдарч байсан гурван хүний гавал, гар, хөлийн яс олдож байжээ.