Балтын хуванд үл мэдэгдэх байгалийн антибиотик илэрчээ

Я.Болор | Zindaa.mn
2021 оны 04 сарын 06

АНУ-ын судлаачид Балтын хувны бүтэц, найрлагыг судлах явцад дотор нь их хэмжээний үр мэдэгдэх антибиотикийн молекул илрүүлжээ. Эдгээр нь бусад төрлийн антибиотикт тэсвэртэй нянг устах чадвартай гэнэ.

Олон арав, зуун сая жилийн өмнө бүрэлдэн тогтож, чулуужсан модны давирхай нь палеонтологич, уур амьсгал судлаач, геофизикчдийн хамгийн сонирхолтой олдворын нэг юм. Хувны дотор тухайн цаг үеийн агаарын бөмбөлгүүд төдийгүй шавж, ургамал, шувуу, үлэг гүрвэлийн өд, эс зэрэг хадгалагдан үлддэг. Үүнээс гадна хувыг эрт дээр үеэс Балтын тэнгис орчим амьдардаг хүмүүс ардын эмчилгээнд хэрэглэж байжээ. Нунтагласан хув бүхий эм бэлдмэлүүд халдвар, үрэвсэл дардаг гэж үздэг байна.

Миннесотагийн их сургуулийн дэд профессор Элизабет Эмброуз тэргүүтэй судлаачдын багийн судалгаа ийм төрлийн уламжлалт эмчилгээний арга үнэхээр үр дүнтэй байсныг баталжээ. Тэд устаж үгүй болсон Балтын гацуур модны давирхайгаас 40 сая жилийн өмнө үүссэн олон арван хувны химийн бүтцийг судалсан байна. Нунтаг хувны үндсэн дээр гаргаж авсан уусмалд өвчин үүсгэгч нян хийхэд өдгөө өргөнөөр хэрэглэгдэж буй антибиотикт тэсвэртэй алтлаг стафилококк болон түүний омгийг идэвхтэй дарангуйлж байжээ.

Харин Балтын гацуурын орчин цагийн төрлийн /Sciadopitys/ давирхайд ийм бодис илрээгүй байна. Гэхдээ үүнтэй төстэй нэгдлүүд байдаг гэнэ. Тиймээс эрдэмтэд Sciadopitys-ийг ашиглан байгалийн антибиотикийг гарган авч, шинж чанарыг нь нарийвчлан судлах боломжтой гэж үзэж байна.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top