Илүү их уншъя | Улаанбаатарт "Үндэсний номын баяр" өнөөдөр эхэлнэ

УИХ-ын дарга Г.Занданшатарын ивээл дор "Номын соёлт ертөнц" ТББ-аас 33 дахь удаагаа зохион байгуулж буй Үндэсний номын баяр тавдугаар сарын 19-нд Говьсүмбэр, тавдугаар сарын 24-нд Дундговь аймагт болсон бол өнөөдөр буюу тавдугаар сарын 26-28-нд  Улаанбаатар хотноо болно.

Энэ жилийн Үндэсний номын баяр хөдөө орон нутагт эхэлж, монгол сакура буюу буйлс цэцэглэх хавраар “Илүү их уншъя” хэмээн уриалж Говьсүмбэр аймгийн Чойр хотод тавдугаар сарын 19-нд Дуу бүжгийн Боржигон чуулга, Төв номын санд Номын баярын нээлтээ хийсэн билээ. Улмаар баярын буухиа Дундговь аймгийн Мандалговь хотод үргэлжилж тавдугаар сарын 24-нд төв талбайд Номын баярын үйл ажиллагааг зохион байгуулав. Орон нутгийн баярын аялалд нэгдсэн зохиогч, хэвлэн нийтлэгчдийн хувьд ч олон сайхан түүхийг эргэцүүлэн бодох, уран бүтээлдээ тусгах чухал санаа, хамтын ажиллагааг өрнүүлэн ирдэг уламжлалтай. Мөн зочлон очсон аймгаа хотын баяртаа урьж, онцлох зочноо болгодог. Энэ удаагийн онцлох аймаг нь Говьсүмбэр, Дундговь аймаг болов.

Д.Сүхбаатарын талбайд тавдугаар сарын 26-28-нд болох Үндэсний номын баярын нэгдсэн арга хэмжээ энэ өдрүүдэд оройн 20 цаг хүртэл үйл ажиллагаагаа явуулна.

Номын баяраар олон сонирхолтой хөтөлбөрийг уншигчдад хүргэхээр ажиллаж байна. Тухайлбал, Номын фенүүдийн уулзалт, Зурагт номын тухай ойлголтоо тэлье, ЕБС-ийн сурагчдын “Номын баяр – бидний аялал” автобустай аялан ирэх хөтөлбөр, Book networking, Quiz, Уншигч зохиолчийн яриа, “Орон нутагтаа ном хандивлая” аян, “Уншиж чадвал урамшуулъя”, “Хаврын найраг”, “Дэлхий” хамтлагийн тоглолт, “Номын ертөнц” клубийн сурагчдын цүнхтэй ном үзүүлбэр зэрэг оролцогчдод зориулсан гэнэтийн бэлэг хүлээж байгаагийн сацуу Номын баярын судалгаа, Онцлох номууд, “Эмэгтэйчүүдэд урам зориг өгөх 50 номын жагсаалт”, “Зүрхээ уншуулаарай” хөтөч мэдээлэл, Үндэсний Номын баярын санаачлагч Б.Сувдын цуглуулга болох “Номын хавчуурганы үзэсгэлэн” болон зохион байгуулагч хүүхдүүдийн үйл ажиллагаа олны анхаарлыг татах хүлээлттэй байна.

Баярын үеэр Говьсүмбэр аймгийн төлөөлөгчид мэндчилгээ дэвшүүлж, орон нутгаас номын баяраа зорин ирж буй зохиолч, хэвлэн нийтлэгчид өөрсдийн үзүүлбэр, таниулгатайгаа оролцох бөгөөд номын клубийн сурагчид орон нутгаас номын баярынхаа зохион байгуулалтын багт ажиллахаар зорин ирсэн ажээ.

Номын баярт 200 гаруй хэвлэн нийтлэгч, 300 гаруй зохиолч тогтмол оролцдог. Энэ жилийн баярт оролцохоор 50 гаруй зохиогч, хэвлэн нийтлэгч шинээр нэмэгдсэн байна. Номын баярыг дунджаар 180 мянган хүн зорин ирдэг бөгөөд МОНЦАМЭ агентлаг албан ёсны хэвлэлийн түншээр ажиллаж, олон улсад англи, орос, хятад, япон болон үндэсний монгол бичгээр тус тус мэдээ, мэдээлэл түгээдэг. Номын баяр бүрээр 50 гаруй хэвлэл мэдээллийн хэрэгсэл тогтмол мэдээлэл бэлтгэн ажилладаг.

Номын баяр бол зөвхөн ном борлуулах, худалдан авах ажил биш, олон талын хамтын ажиллагаа өрнөдөг талбар. Энэ удаагийн номын баяраар 2011 онд хийсэн уншигчдын судалгааг “Номын ертөнц” сэтгүүлээрээ дамжуулан нийтэлсэн нь, 12 жилийн өмнө бид ямар зохиолчдыг уншдаг байв гэдгийг тольдохоос гадна ямар агуулгатай ном уншиж байснаа харьцуулах боломжийг олгож байна. Ингэснээр ном зүйчид болон мэргэжлийн хүмүүст ч агуулгын хувьд хэрхэн өөрчлөгдсөн талаарх уншлагын чиг хандлагыг харьцуулах боломж бүрдэнэ.

Улаанбаатарчуудын зорьж буй “Дэлхийн номын нийслэл” цолыг авах хамгийн эхний шалгуур нь уншлага. Бүх нийтээр уншдаг хотын иргэд нэр дэвшдэг тул “Орон даяар уншъя” хэмээн уриалж, уншлагыг дэмжсэн аймаг орон нутагтай “Номын соёлт ертөнц” ТББ хамтран ажиллах гэрээ байгуулах, уншлагыг сурталчлах, зөв агуулгыг нь чиглүүлэхийг зорьж байна.

Энэ жил төрийн байгууллагуудад хандан номын тэтгэлэг олгох ажлыг бодлогоор, маш чухал агуулгуудыг гарган тавьж байгаа хэвлэн нийтлэгчдээ дэмжих тодорхой хэмжээний “грант” бий болгох хүсэлтийг “Номын соёлт ертөнц” ТББ-аас гаргасан нь тухайн агуулгыг сурталчлан, мөнгөн дэмжлэгийг нутагшуулж эхлүүлэх цаг болсон гэж үзэж байгаатай холбоотой.

"Номын соёлт ертөнц" ТББ нь Үндэсний номын баярыг жилд хоёр удаа зохион байгуулдаг. Мөн “Номын ертөнц” нэвтрүүлгийг ТВ9 телевизээр долоо хоног бүр үзэгчдэд хүргэж байна. Номын баярын үеэр номын мэдээллийг багцалсан “Номын ертөнц” сэтгүүлийг 5000 хувь хэвлэн үнэ төлбөргүй уншигчдад түгээдэг. “Редактор” клуб хамтын ажиллагааныхаа хүрээнд ном редакторлох, редактор зүй, ном зүйн соёлыг агуулсан бүтээлүүд дээр ажиллахын сацуу сургалт хийж, ном зүйн соёлыг ном бүтээгчдэд ойлгуулах зорилгоор баг бүрдүүлэн ажиллаж байна. Мөн байгууллагын дэргэдэх “Номын ертөнц” клубийн сурагчид номын баярын арын албанд ажиллах гол хүчийг бүрдүүлдэг бөгөөд энэ жил 250 орчим хүүхэд ажиллана.