ӨГЛӨӨНИЙ МЭНД!

Өнөөдөр 2024.01.20. Билгийн тооллын 10. Монгол эх оронд маань нар 08 цаг 34 минутад мандлаа, 17 цаг 32 минутад жаргана.

Улаанбаатар хотод үүлэрхэг. Өдөртөө -19 хэм, шөнөдөө -33 хэм. Та хувцасаа тохируулж өмсөөрэй.

Өнөөдөр Малид Зэвсэгт хүчний өдөр, Дагестанд Улсын боловсролын өдөр, Крымд Бүгд найрамдах улсын өдөр.

Энэ өдөр Америкийн усанд сэлэгч, олимпын дөрвөн удаагийн аварга Жон Нейбер, жүжигчин Эван Питерс, “Guns N’ Roses” хамтлагийн гишүүн асан, гитарчин, дуу зохиогч Трэйси Ганс, Их Британийн төгөлдөр хуурч Гэри Барлоу, Бельгийн хаан Филиппийн эхнэр Матильда, Оросын балетчин Анастасия Волочкова, модель, жүжигчин Ольга Бузова, Францын жүжигчин Омар Си зэрэг алдартан мэндэлжээ.

Энэ өдөр Монгол Улсын түүхэнд болсон онцлох үйл явдлууд:

1926 оны энэ өдөр аливаа яам, тамгын газрын түшмэдүүд ээлж халалцан суудаг ёсыг халах тухай шийдвэр гарчээ.

1933 оны энэ өдөр Сайд нарын зөвлөлийн шийдвэрээр ардын цэргийн ангиудаас зарим анги, салбарыг Хязгаарын цэрэгт шилжүүлэн өгөхөөр заав.

1964 оны энэ өдөр БНМАУ болон БНХАУ-ын Засгийн газрын Гадаад худалдааны төлөөлөгчид Бээжин хотод 1964 оны харилцан бараа нийлүүлэлтийн гэрээнд гарын үсэг зурав. Гэрээнд БНХАУ Монгол Улсад торго дурдан, цемент, химийн үйлдвэрийн түүхий эд, тоног төхөөрөмж болон өдөр тутмын төрөл бүрийн бараа зэргийг нийлүүлэх бол БНМАУ-аас БНХАУ-д морь, өлөн гэдэс, арьс, арьсан эдлэл зэргийг нийлүүлэхээр заажээ.

2004 оны энэ өдөр Монгол Улс ШХАБ-ын хамгийн анхны ажиглагч улс болсон байна.

Энэ өдөр дэлхий дахинд болсон онцлох үйл явдлууд:

1841 оны энэ өдөр Их Британийн цэргүүд Хонконгийг эзэлжээ.

1944 оны энэ өдөр Их Британийн Агаарын цэргийн хүчин Берлин рүү 2300 тонн бөмбөг хаясан байна.

1980 оны энэ өдөр АНУ-ын Ерөнхийлөгч Жимми Картер Москвагийн олимпыг бойкотолж байгаа тухайгаа зарлажээ.

1996 оны энэ өдөр Ясир Арафат Палестины Ерөнхийлөгчөөр сонгогдов.

Өнөөдөр үс засуулвал Эрч хүч ихэснэ.

Эл өдөр туулай жилтнээ аливаа үйлийг хийхэд эерэг сайн бол гахай, хулгана жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр гэмтнийг шийтгэх, хишиг даллага дуудуулах, насан бүтээл хийлгэх, эрдэнийг гадагш өгөх, мал худалдан авах, мал түгээх, сахил санваар авах, огторгуйн үүдийг боох, их хүмүүнтэй уулзахад сайн. Хануур, төөнүүр хийлгэх, балгадын суурь тавих, нохой худалдан авахад муу. Өдрийн сайн цаг нь бар, туулай, могой, бич, нохой, гахай болой. Дашням өдөр.

Хол газар явах бол зүүн хойш мөрөө гаргаад аян замдаа гараарай.

Өнөөдрийн ажилд тань амжилт хүсье.