”Витафит”- ын ундаа хөгзтэй байсан нь дэлгүүрийн буруу биш гэлээ

Өнгөрсөн 2012 онд Витафитын гоё нэрийн ундаа хөгзтэй байсан бичлэг одооч Yutube-д бий. /Бичлэгийг энд дарж үз/ Зайсан явах замд байдаг Оргил худалдааны төвөөс гоё нэрийн ундаа худалдаж авсан эмэгтэй хөгзтэй гэдгийг нь мэдээд тус дэлгүүрт дахин очиход нэг багц ундаа тэр чигээрээ хар хөгзөөр дүүрсэн байсан юм.

Харин энэ сарын 18-ны өдөр 11-р хорооллын  “Дэвжих хос” мини маркетаас гоё нэрийн ундаа худалдаж авсан эмэгтэй “Миний худалдаж авсан ундаа хөгзтэй  байсан. Ундаа уусан хүүхэд хордоод гурван өдөр гүйлгэж, бөөлжиж байна” гэж TV8 телевизэд  ярилцлага өгсөн байна лээ. /Тv8-ын мэдээг энд дарж үз/

“Дэвжих хос”-оос ундаа худалдаж авахад хөгзтэй байсан талаар манай сайт мэдээлсэн юм. Гэтэл Витафит компанын маркетингийн албанаас залгаж, уг мэдээллээ устгахыг шаардаж, сүрдүүлсэн.  Тэгэхдээ “Танайх манай нэр төрд халдлаа.  Хөгзтэй ундаа манай компанийн буруу биш. Тухайн дэлгүүр хугацаа дууссан бүтээгдэхүүнийг удаагаад хөгзрүүлсэн байна лээ. Манай ч буруу биш дэлгүүрийн буруу болсон. МХЕГ-т бүтээгдэхүүнээ шинжилгээнд явуулсан.  Хариу нь бараг зүгээр гээд гарч байгаа. Удахгүй хариу нь ирнэ.  Хариуг нь гартал энэ мэдээллээ авчих. Мөн TV8 телевиз манай компанийн нэр төрд халдсан. Бизнесийн нэр хүндийг унагах гэсэн иргэнээс ярилцлага авч, хянаж нягтлалгүйгээр олон нийтэд нийтэлсэнээрээ буруутай гэдгээ хүлээн зөвшөөрсөн.  Биднээс уучлалт гуйсан” гэж утсаар ярьсан юм. Тухайн мэдээг бэлтгэн гаргасан ТV8 телевизийн сэтгүүлч Б.Ганцэцэгтэй утсаар холбогдож энэ талаар тодруулахад  “ Витафитаас надтай хүн ирж уулзсан юм байхгүй. Энэ талаар сурвалжилж эргэж мэдээлэхээр ажиллаж байгаа” гэлээ.     

Ингээд бид мэдээллийг нягтлахаар хөгзтэй ундаа зарсан гэх “Дэвжих хос” миний маркетад очиход  оройн 23.00 цагийн үед уг дэлгүүр ид ажиллаж байна.

Худалдагчтай уулзаж, уг дэлгүүрийн кассаас энэ талаарх зарим зүйлийг тодруулсан юм.  

-Тv8 телевизэд ярилцлага өгсөн н.Зулцэцэг гэх эмэгтэй танайхаас гоё нэрийн ундаа авсан юм уу?

-Тэр телевизээр ярьсан эмэгтэй манайхаас ундаа аваагүй. Тэрний нөхөр нь бололтой нэг залуу орж ирээд ундаа авсан. Ундаа авахдаа сэгсэрч үзээд хараад авч байсан. Тэд нар дэлгүүрээс юм авахдаа  сайн харж, нягталж авдаг юм.  Хөгзтэй ундаа байлаа гэхэд мэдэхгүй аваад явах хүмүүс биш.

-Танай байнгын үйлчлүүлэгч нар уу?

- Эндэхийн оршин суугч нар биш. Урд нь харагдаж байгаагүй. Түр  оршин сууж байгаа хүмүүс л байх. Өмнө нь огт харагдаж байгаагүй. Сүүлийн үед л орж гараад хэд хэдэн удаа үйлчлүүлж байсан юм.

-Хөгзтэй ундаа авсан талаараа танай дэлгүүрт хандсан уу?

-Нөхөр нь ундаа худалдаж авсанаас хоёр цагийн дараа эхнэр нь гэх Зулцэцэг орж ирээд танайхаас авсан ундаа хөгзтэй байна. Нэг аягыг уучихаад дахиад уух гэсэн чинь хөгз гараад ирлээ. Би уучихсан, хүүхэд ч уучихсан болохоор сэжиглээд байна одоо яана аа гэж орж ирсэн. Тийм байх учиргүй гэдгээ хэлсэн. Тэрнээс хойш ганц ч орж ирээгүй.  

-Танай дэлгүүрийн буруу болсон. Хугацаа хэтэрсэн ундаа зарж байсан гэж витафитаас хэлсэн?

-Тийм юм байхгүй. Тэгэж худлаа хэлж яаж байгаа юм бол доо. Тэр гоёын багцаас үлдсэн хэд хэдэн ундаа одоо ч байгаа. 2014 оны 3 сарын 4-нд үйлдвэрлэгдсэн ундаанууд бий. Манайх жижигхэн дэлгүүр. Хугацаа хэтрээд аливаа юмыг хөгзрүүлээд  суухгүй. Бараагаа бага багаар авдаг хурдан эргэлдүүлдэг. Би өөрөө эрүүл ахуйч хүн энэ талаар мэднэ. Та нар харж байгаа бол манайх олон хөргүүр хөлдөөгчтэй. Цэвэр орчинд бараагаа зардаг. Тэр ундааны асуудал гарсанаас хойш хэл чимээгүй гэнэтхэн МХЕГ-аас шалгалт орж ирээд, дэлгүүр түгжиж байгаад шалгасан. Зөрчил илрээгүй. Харин ч Витафит компаниас энэ асуудалд арга хэмжээ авч хурдан шийдвэрлэж чадаагүй. Дэлгүүрийн нэрийг гаргасандаа уучлалт  гуйгаад өөрийн лабортортоо шинжлүүлсэн бичгээ явуулсан. Тэднээх өөрийнх нь лаборторын бичиг юм чинь муу гарсан ч муу гэж явуулахгүй биз. Ямарч байсан шинжилгээний хариу сайн гарсан гэсэн бичиг явуулсан байна лээ. Мөн манайх камертэй. Ундаа худалдаж авч байхад камерт юу ч гараагүй. Хар юм харагдаагүй. Цэвэр ундаа байсан.

Н.Ганаа