Сансрын анхны аялагч япон тэрбумтан уран зургуудаа зарж эхлэв

Илон Маскийн 2023 онд хийхээр амласан сансрын анхны аяллын бүх тасалбарыг үнэ цохин худалдан авсан Японы тэрбумтан Юсакү Маэзава уран зургийн цуглуулгаасаа зарахаар шийджээ. Энэ сарын 16-нд Нью-Йоркийн Sotheby`s дуудлага худалдаагаар Энди Уорхолын 1.5-2 сая ам.доллар, Эд Рушейгийн 2-3 сая ам.долларын үнэтэй бүтээлүүдийг зарах юм байна.

Түүнээс яагаад уран зургуудаа зарж эхэлж буйг лавлахад “Сохор зоос ч үгүй болчихоод байна” гээд инээмсэглэжээ. Хэдийгээр сүүлийн нэг жилийн хугацаанд Zozo-гийн эзэн Маэзавагийн хөрөнгө 700 сая ам.доллароор “нимгэрсэн” нь үнэн ч уран зургуудаа зарахаар хэмжээнд хүртлээ халаас нь хоосроогүй гэж Forbes тооцжээ. Forbes-ийн тооцоогоор бол Маэзава одоо 1.8 тэрбум ам.долларын хөрөнгөтэйгээр толгой баячуудын жагсаалтад Япондоо 22-т, дэлхийд 1281-д бичигдэж байна.

Маэзава бол уран зурагт үнэ хайрладаггүйгээрээ  зартай нэгэн. Жан-Мишель Баскийн нэргүй бүтээлийг 110.5 ам.доллароор худалдан авснаар дэлхийн уран зургийн үнийн дээд хэмжээг тогтоосон удаатай.

Мөн дэлхийн хамгийн алдартай жиргээний эзэн. Шинэ жилийн баярыг тохиолдуулан Zozo-гийн хямдралтай худалдааг зарлахдаа ретвит хийсэн тохиолдлын 100 хүнийг тус бүр 100 сая иенээр шагнана гэсэн зар тарааж, улмаар 4.8 сая хүн түүний постыг ретвит хийсэн юм.