iPhone, iPad-ийн загварыг зохион бүтээсэн Apple-ийн ерөнхий дизайнер Жонатан Айв ажлаасаа гарчээ. Тэрбээр ирэх жилээс өөрийн гэсэн бизнесээ эхлүүлэхээр зэхэж байна.
Financial Times-ийн мэдээлснээр Жонатан Айв 2020 онд LoveFrom нэртэй дизайнын компани байгуулан ажиллах ажээ.
“Хэдийгээр би одоо Apple-ийн ажилтан биш ч гэсэн урьдын адил тэдэнтэй хамтран олон жил ажиллах болно гэж найдаж байгаа” хэмээн Жонатан Айв өгүүлсэн байна.
Харин Apple-ийн тэргүүн Тим Кук “Бид олон жилийн турш хамтран ажиллаж буй тэр багийнхантайгаа мөн Жонтой үргэлжлүүлэн ажиллахдаа дуртай байх болно” хэмээн мэдэгджээ.
Тэгвэл Financial Times “Энэ бол Apple-ийн эриний төгсгөл” гэж тодотгоод Жонатан Айвыг “Дэлхийн хамгийн алдартай зохион бүтээгч”, “Apple-ийн загварын гоо сайхны гол амин сүнс” гэж нэрлэсэн байна.
Жонатан Айв Apple-ийн дизайны олон талт ажилд бүгдэд нь оролцож, эцсийн шийд сонголтыг хийсээр иржээ. Гадаад өнгө, загвар болон дэлгүүрийн интерьер, Apple Park зэрэг томоохон архитектурын төслийн загварыг тэр л гаргасан юм байна.
Стив Жобс Жонатан Айвын мэдрэмж, хамтын ажиллагааны дүнд л iPhone, iPad, iPod, iMac бий болсныг онцолжээ.
Сэтгэгдэл ( 0 )