Арванхоёрдугаар сард 55 тэрбумын ТЭТГЭВРИЙН ЗЭЭЛ олгогджээ

Тэтгэврийн зээлийг тэглэх асуудлыг Ерөнхийлөгч мэдэгдсэнээс хойш 100 тэрбум төгрөгийн тэтгэврийн зээл олгогдсон гэж  УИХ-ын гишүүн Ц.Мөнх-Оргил ярьсан. Тэгвэл Монголбанкнаас өгч буй мэдээллээр энэ нь үгүйсгэгдэж байна.

Банкууд 2019 оны 12 дугаар сарын 31-ий өдрийн байдлаар 228.7 мянган зээлийн дансанд 757.9 тэрбум төгрөгийн тэтгэврийн зээлийн үлдэгдэлтэй байна. Энэ нь 2018 оны эцэстэй харьцуулахад 167.5 тэрбум төгрөг буюу 18.1 хувиар буурсан үзүүлэлт юм.

Нэг зээлдэгчид ногдох тэтгэврийн зээлийн хэмжээ дунджаар 3.3 сая төгрөг байна.

Тэтгэвэр барьцаалсан зээлдэгчдийн 20.1 хувь нь 3.0 сая хүртэлх төгрөгийн, 55.1 хувь нь 3.0-6.0 сая хүртэлх төгрөгийн, 15.4 хувь нь 6.0-10.0 сая хүртэлх төгрөгийн, 9.4 хувь нь 10.0 саяаас дээш төгрөгийн зээлийн үлдэгдэлтэй байна.

2018-2019 оны тухайн сард олгосон тэтгэврийн зээл дүнг зурагт харуулав. 2019 оны 12 дугаар сард өмнөх саруудын дундажтай ижил хэмжээний буюу 55 тэрбум төгрөгийн зээл шинээр гарчээ. Энэ нь өмнөх оны 11 дүгээр сараас 1 тэрбум төгрөгөөр бага дүн юм.

Зураг 1. Тухайн сард олгосон тэтгэвэрийн зээл, тэрбум төгрөгөөр