Сангийн яам уул уурхайн салбараас олох орлогын төсөөллөө бууруулжээ

Коронавируст цар тахлын нөхцөл байдал, гадаад зах зээлийн нөхцөл байдлаас шалтгаалан Сангийн яам уул уурхайн салбараас олох орлогын төсөөллөө бууруулсан байна.

Энэ оны батлагдсан төсөвт уул уурхайн салбараас нийт 3.19 их наяд төгрөгийн орлого олно гэж тооцоолсон байсан. Гэвч цар тахлын улмаас зэм, нүүрс, төмрийн хүдэр, газрын тосны үнэ буурч, ихээхэн хэлбэлзэлтэй байгаа юм.

Гадаад зах зээлийн дээрх нөхцөл байдлаас шалтгаалан өмнөх төсөөлөлд хүрэх боломжгүй болсон учир өмнөх төсөөллөө бууруулж, уул уурхайн салбараас 2.69 их наяд төгрөг төвлөрүүлэхээр төсвийн тодотголд тусгажээ.

БНХАУ-ын эдийн засаг эргэн сэргэх төлөв ажиглагдаж байгаа учраас түүхий эд ялангуяа төмрийн хүдэр, зэсийн үнийн хэлбэлзэл аажимдаа саарч нөхцөл байдал бага зэрэг сэргэнэ гэж шинжээчид таамаглаж байна.

Энэ оны эхний долоон сарын нийгэм эдийн засгийн үзүүлэлтийг харвал уул уурхай, олборлох салбарын орлого 41 хувиар буурсан үзүүлэлттэй гарсан юм.