"Эрдэнэс Тавантолгой" 32 ИХ НАЯДЫН орлоготой ажиллана

“Эрдэнэс-Тавантолгой” компаниас өчигдөр (2021.03.11) мэдээлэл хийлээ. Тус компанийн гүйцэтгэх захирал Б.Ганхуяг мэдээллийнхээ эхэнд өнөөдөр бол түүхэн өдөр тохиож байна гэж хувьдаа дүгнэж байна гэсэн юм.

Тэрбээр "Эрдэнэс-Тавантолгой" компани 2021-2025 онд хэрэгжүүлэх дунд хугацааны "А6-20" гэсэн бизнес төлөвлөгөөг холбогдох яамд болон төрийн байгууллагууд, ТУЗ-өөрөө хэлэлцүүллээ. Удаан хугацаанд хэлэлцлээ. Дөрөв орчим сарын хугацаанд нэлээн сайн нягталсны эцэст "А6-20" бизнес төлөвлөгөөгөө батлуулж чадсан. Өнөөдөр /өчигдөр/ тогтоол нь баталгаажаад энэ өдрөөс хэрэгжээд явна. Компани 2017-2020 оны хооронд хэрэгжих бизнес төлөвлөгөөг өнгөрсөн жилүүдэд мөрдөж ажилласан. Энэ бизнес төлөвлөгөө амжилттай хэрэгжсэн бөгөөд тэдгээрээс зургаан гол заалтыг амжилт гэж үзэж, цаашид амжилтаа ахиулахаар томоохон зорилтууд тавьсан гэсэн юм. Бизнес төлөвлөгөөний нэршлийн тухайд А6 гэдэг бол 2017-2020 оны хооронд хэрэгжүүлсэн амжилт буюу дунд хугацаанд хийж хэрэгжүүлэх бизнес төлөвлөгөөний урьдач нөхцлийг тодотгож буй аж. 20 гэдэг бол 20 том зорилт бийг тодотгожээ. Ирэх таван жилийн хугацаанд компани 10.1 их наяд төгрөгийн хөрөнгө оруулалтыг өөрийн хамаарал бүхий төсөл хөтөлбөрүүд, охин компаниудаа санхүүжүүлж, бизнесээ хөгжүүлж явна. Ирэх таван жил хөрөнгө оруулалт, бүтээн байгуулалт, тэрдундаа үндэсний их бүтээн байгуулалт, барилгын ажлууд явагдах жил байна. Үүнийг бид үсрэнгүй хөгжлийн үе шат гэж үзэж байгаа гэдгийг онцлов. 

Мөн 20/50 гээд компанийн урт хугацааны стратеги төлөвлөгөө бий. Уг төлөвлөгөө өсөлт, хөгжлийн үе гэж томьёологдож байгаа. Компани таван жилийн хугацаанд 32 их наяд төгрөгийн орлоготой ажиллана. Компанийн үнэлгээ өнөөдөр 13.4 их наяд байгаа. Энэ гэхдээ бизнесийн үнэлгээ биш. Засгийн газраас гаргасан тогтоолын хүрээнд 15 тэрбум ширхэг хувьцааны, нэгж хувьцааны үнийг 933 төгрөг гэдгээр тооцож гаргасан үнэлгээ. Тэгвэл компани таван жилийн дараа гэхэд 50 их наяд төгрөгийн үнэлгээ бүхий үндэсний том компани болж хөгжих юм. 20 төслийн хүрээнд 5500 ажлын байр бий болгоно. Өнгөрсөн хугацаанд, 2018 оны наймдугаар сарын 26-нд нүүрсний нөөцийг Тавантолгойн ордын хувьд анх удаа нэгдсэн тооцооллоор батлуулсан. Компанийн үнэ цэнийг шийдвэрээр биш бизнесийн агуулгаар тогтоосон. Нэгж хувьцааны үнэ 933 төгрөг биш 1041 төгрөг гэж тогтоосон. Алдагдалгүй, өргүй болгож ашигтай ажиллуулсан. 1072 хувьцааг анх удаа улстөрийн зорилгогүйгээр, бизнесийн агуулгаар нь амилуулж, иргэдэд, төрд ногдол ашиг олгосон. Төмөр зам болон бусад бүтээн байгуулалтын төслүүдээ өөрийн орлого, хөрөнгөөрөө санхүүжүүлж, үйл ажиллагаануудыг нь эхлүүлсэн. Нийгмийн хариуцлагын хүрээнд Улаанбаатар хотын утааг 50 хувь бууруулахтай холбоотой “Тавантолгой түлш” компанийг санхүүжүүлж ажиллаж байна. Ажилчдын цалин хөлс нэмэгдсэн, ажиллах орчин сайжирсан зэрэг олон амжилтууд байна.

Ирэх жилүүдэд компанийн зүгээс хамаарч ажиллах найман төсөл бий. Хамтарч ажиллах, дэмжиж ажиллах төслүүдийг нийлүүлж тооцохоор нийт 20 төсөл, хөтөлбөр байна. Тавантолгой-Гашуунсухайтын төмөр зам, Тавантолгой-Зүүнбаянгийн төмөр зам, Тавантолгойн ДЦС гэсэн гурван төсөл компани болж, албан ёсоор хэрэгжиж байна. 2021-2022 он бол компанийн бүсээ чангалж, бүх үйл ажиллагаагаа бүтээн байгуулалт, хөрөнгө оруулалт руу чиглүүлэх хоёр жил байх юм. Тиймээс үзүүлэлтүүдийн тооцооллоо 2023 оноос эхлэн танилцуулж байна. 2023 онд бид долоон их наяд төгрөгийн, 2024 онд 9.1 их наяд төгрөгийн, 2025 онд 10 их наяд төгрөгийн жилийн борлуулалтын орлоготой ажиллана. 1072 хувьцаатай иргэн 2023-2025 он хүртэл жилд 669.751 төгрөгийн ногдол ашиг хүртэх тооцоо гарсан.

“Эрдэнэс-Тавантолгой” компани энэ 2021 онд 2.5 их наяд төгрөгийн хөрөнгө оруулалт хийх ёстой. Хоёр их наяд төгрөгийн бонд гаргана гэж төлөвлөсөн. Эхний ээлжинд 800 орчим тэрбум төгрөгийн бонд худалдаалахаар холбогдох бичиг баримтыг Санхүүгийн зохицуулах хороо, Монголын хөрөнгийн биржид гуравдугаар сарын 5-ны өдөр хүлээлгэн өгсөн хэмээн мэдэгдлээ.

Эх сурвалж: ӨГЛӨӨНИЙ СОНИН