Замын-Үүд боомтод ариутгалын төхөөрөмж туршилтаар ажиллуулж байна

Э.Мөнхжин | Zindaa.mn
2021 оны 07 сарын 27

Замын-Үүд боомтын экспортын чиглэлд эхний ээлжийн ариутгалын төхөөрөмжийг долоодугаар сарын 24-нөөс туршилтын журмаар ажиллуулж эхэлсэн гэж Засгийн газраас мэдээллээ.  Уг төхөөрөмж нь 4 улиралд ажиллах боломжтой, 1 тонн ариутгалын бодисоор 400 автомашиныг ариутгах хүчин чадалтай аж.

Замын-Үүд боомтын импортын чиглэлд угсрах төхөөрөмжийг өнөөдөр Эрээн боомтоос татан авч ариутгалын төхөөрөмжийг ажлын 4 өдөрт угсарч бэлэн болгохоор ажиллаж байна. Замын-Үүд суман дахь ачааны автомашины бөөгнөрлийг багасгаж, халдварын дэглэм сахиулах үүднээс хилээр нэвтрэх автомашинуудад дугаар олгож, 72 цагийн өмнө мэдэгдэж байх нэгдсэн бүртгэлийн систем ажиллуулж эхэлжээ.

БНХАУ-ын Эрээн боомтын хилийн бүсэд ажиллах 100 жолоочийг сонгон, жолооч нэг бүрийн биеийн байдлыг хянах хуудас гаргаж, 7 хоногт 2 удаа PCR шинжилгээ авч, тусгаарлах арга хэмжээ авч байна.

Замын-Үүд боомтын хилийн бүсээс дундын тээвэр хийх 100 жолоочийн судалгаа гарган, сонгон шалгаруулах, тусгаарлах арга хэмжээ авна.

Замын-Үүд хилийн боомтын гарах чиглэлд өдөрт 110 автомашин гаргаж байгаа бөгөөд үүнээс 100 автомашин ачаагүй, нүүрстэй 10 автомашин гарч байна. Орох чиглэлд ачаатай 100 автомашин, импортын 50-60 автомашиныг өдөрт нэвтрүүлж байна гэв.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top