АИ-92 шатахууны үнийг 70 төгрөгөөр НЭМЛЭЭ

Э.Мөнхжин | Zindaa.mn
2021 оны 12 сарын 03

Шатахуун импортлогчид АИ-92 автобензиний үнийг өнөөдрөөс 70 төгрөгөөр нэмэгдүүлжээ.

Сануулахад, өнгөрсөн сарын 22-ны өдөр “Газрын тосны бүтээгдэхүүний хангамж, үнийг тогтворжуулах асуудлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн байгууллагуудын хамтарсан зөвлөл” хуралдсан. Хуралдаанаар, Уул уурхай, хүнд үйлдвэрийн яам, Ашигт малтмал, газрын тосны газар, Шатахууны худалдаа эрхлэгч аж ахуйн нэгжүүдэд: Өргөн хэрэглээний Аи-92 автобензиний хангамж, нөөцийг Засгийн газрын холбогдох тогтоолд заасан хэмжээгээр бүрдүүлж, тус бүтээгдэхүүний жижиглэнгийн үнийг  огцом хэлбэлзэлгүйгээр, зах зээлийн горимд аажмаар шилжүүлэх бодлого баримтлан ажиллах талаар зөвлөмжийг гаргасан юм.

Үүний дараа импортлогчид АИ-92 автобензиний үнийг 100 төгрөгөөр нэмэгдүүлсэн бол өнөөдрөөс ийнхүү 70 төгрөгөөр дахин өсгөлөө.

Уул уурхай, хүнд үйлдвэрийн дэд сайд О.Батнайрамдал шатахууны нийлүүлэлт, салбарын нөхцөл байдлын талаар мэдээлэл өгөхдөө “2021 оны 11 сарын байдлаар шатахууны хил үнэ тонн тутамд 830 доллар байгаа ба жижиглэнгийн хил үнэ литр тутамд 1785 төгрөг буюу нийт өртгийн 74 хувийг бүрдүүлж байна. Энэ үнэ дээр гаалийн албан татвар, автобензиний албан татвар, НӨАТ зэрэгт 325 төгрөг буюу нийт өртөгт 14 хувь, үйл ажиллагааны зардал 295 төгрөг буюу нийт өртөгт 12 хувийг эзэлж шатахууны нийт өртөг 1 литр тутамд 2405 төгрөг болж байгаа юм.

Иймд цаашид шатахууны үнийг зах зээлийн горимоор явуулж, үнийг үе шаттайгаар чөлөөлөх хамтарсан зөвлөмжийг өнөөдрийн хурлаас гаргалаа. Гэхдээ иргэдийн амьдралд дарамт үүсгэхгүйгээр аажмаар зах зээлийн ханштай уялдуулан өсгөж, бууруулах асуудлыг хэлэлцсэн байна. Өөрөөр  хэлбэл, төр оролцохгүйгээр зах зээлийн эрэлт нийлүүлэлтээс хамаарч, гадаадаас импортлон борлуулж буй шатахууны жижиглэнгийн үнийг сүүлийн зургаан сарын дундаж үнээр тооцох автомат үнийн тооцоолол юм. Мөн үнийн өөрчлөлт нь нийт үнийн дүнгийн 5% буюу ойролцоогоор литр тутам 100 төгрөгөөс хэтрэхгүй байхаар үнийн заагийг тогтоох саналыг зөвлөлийн гишүүд дэмжлээ. Ингэснээр нэг удаагийн үнийн огцом хэлбэлзэлд савлахгүйгээр аажмаар өсгөж, бууруулах автомат үнийн тооцоолол руу шилжиж байна.

Дэлхийн зах зээл дээрх газрын тосны ханшийн өсөлтийн нөлөөгөөр манай улсад нийлүүлэгдэж буй шатахууны хил үнэ нэмэгдсээр байгаа. Тухайлбал, 2021 онд АИ-92 автобензин 71.3 хувиар, ДТ 59.6 хувиар өссөн байна” гэсэн юм.

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Хөвсгөл (103.57.92.47) 2021 оны 12 сарын 03

Хөвсгөлд 100төг нэмсэн байх юм

0  |  0
zoxhin(64.119.22.176) 2021 оны 12 сарын 03

nemhees uur yu ch mededgvi ergvv malnuud

0  |  0
Top