Мобикомын удирдлагуудыг “Хүүхэд барьцаалсан хэрэг”-т саад учруулсан гэх шалтгаанаар шалгажээ

Дархан-Уул аймагт найман настай хүүг 30 гаруй цагийн турш барьцаалан эцэг, эхээс нь 100 сая төгрөг нэхсэн хэрэг олныг цочроосон. Хүүхэд барьцаалагчийг өнгөрсөн пүрэв гарагийн 21.00 цагийн үед саатуулан шалгаж байгаа бөгөөд гэмт этгээд Г.Энх-Од нь  Дархан-Уул аймгийн ТВ-12 телевизийн захирал, 29 настай залуу байжээ. Тэрбээр бусдад их хэмжээний өртэй учраас хүүхэд барьцаалан мөнгө олох зорилготой байсан аж. Түүнд цагдаагийн байгууллагаас Эрүүгийн хуулийн 112.1-д зааснаар буюу “Аж ахуйн нэгж, байгууллага, иргэнээс мөнгө, бусад эд хөрөнгө гаргуулах буюу өөр бусад үйлдэл гүйцэтгүүлэх, эсхүл үйлдэл гүйцэтгэхээс татгалзуулах болзол тавьж хүнийг барьцаалсан” гэдэг үндэслэлээр эрүүгийн хэрэг үүсгэн шалгаж байна. Түүнээс гадна үүрэн холбооны “Мобиком” корпорацийн удирдлагуудыг дээрх хэрэгтэй холбоотой мөрдөн байцаалтад саад учруулсан гэх шалтгаанаар шалгаж байгаа аж.

Н.Алтай