Хэн ч өөрчилж болох програмд итгэсэн газар хуваах ажлаа эргэж хараасай

Нийслэлийн удирдлагууд анх удаа ард иргэдийн саналыг цахимаар авч, огт газар эзэмшдэггүй иргэдэд үнэгүй газар эзэмшүүлэх ажлыг зохион байгуулсан билээ. Хотын иргэд үнэгүй газартай болох нь гэж нэлээд баярлацгаасан юм. Ингээд энэ сарын 01-15 өдрүүдэд иргэдийн хүсэлтийг хүлээн авч, цахим хэлбэрээр бүртгэсэн. Энэ хугацаанд нийтдээ 281140 иргэн бүртгүүлсэн юм билээ. Цахим сайт анхнаасаа л гацаж, буруу зөрүү хариу хэлж ойлгомжгүй болж эхэлсэн. Мөн функцууд нь эмх цэгцгүй зэрэг шүүмжлэлийг дагуулсаар байлаа. Гэхдээ л алдаатай ч оноотой ч цахим бүртгэл явдгаараа явж хотын удирдлагууд анх удаа иргэдийнхээ хүсэлтийг цахимаар авсан.  

Хамгийн гол нь сугалаа гэдэг нэрийдлээр иргэдийг газартай болохыг баталсан нь ойлгомжгүй байгаа юм. Анхнаасаа уг асуудлыг эмх цэгцгүй, бодлого төлөвлөлтгүй явууллаа. Төрийн байгууллага хуулийг хэрэгжүүлэхдээ сугалаа ашиглана гэдэг хаанаас ургасан ямар учиртай хэнд ашигтай “моод” юм бэ. Манай төрийн удирдлагууд гол ажлынхаа агуулгыг биш хэлбэрийг хэт хөөж иргэдийн аминд тулсан чухал асуудлыг “шоу” болгож, улс төр хийх нь сүүлийн үед ихэд давамгайлж байна. Арга ч үгүй байх сонгуулийн дуу ойртсоных биз.

Газар өмчлүүлэх цахим сугалаанд нийт 281140 иргэн бүртгүүлснээс 14954 иргэн газраа өмчилжээ. Баянзүрх дүүргийн 20 дугаар хороо Хожуулын аманд 909, Сонгинохайрхан дүүргийн 21 дүгээр хорооны Соёондын аманл 4169, Хан-Уул дүүргийн 12, 13 дугаар хорооны 869, Багануур дүүргийн 4 дүгээр хороо Тариан булагийн 1 дүгээр хэсэгт 7504, Баганхангай дүүргийн 2 дугаар хороо Бор-Үзүүрт 1484 иргэн  газартай боллоо.

Иргэдэд энэхүү газартай болох эрхийг олгохдоо програмын тусламжтайгаар сонгон шалгаруулсанзд л хамаг учир байгаа юм. Програм бол програм. Түүнийг яаж ч програмчлах боломж нээлттэй бий. Тийм учраас л хардлага дагуулсаар байгаа байна. Тухайн программыг зохиосон ажлуулж байгаа “нөхөд” яаж ч ажиллаж танилынхаа болон өөрсдийнхөө нэр дээр газар авах бүрэн боломжтой. Энэ байтугай зүйл хөгжсөн байна. Эсвэл манай том дарга нар ийм арга сэдэж өөрсдөө далд хэлбэрээр танилаараа дамжуулан хотын зах руу газартай болсон ч юм бил үү.  Ийм хардлага иргэдийн дунд гарсан нь твитрийн ертөнцөөс харагдаж байна. Шударга болоогүй байх гэсэн хардлагыг төрүүлсэн бас нэг зүйл бол нэг хүний нэр дээр дараалсан хоёр газар олгосон явдал байлаа. Мөн Солонгос овогтой солонгос нэртэй иргэнд газар олгосон байна лээ. 

Бас болоогүй бүхэл бүтэн 280 мянган иргэн хүсэлт гаргаж тэднээс 15 орчим мянгад нь л боломж олгож байхад нэг гэр бүлийн хоёр хүн хоёулаа азтан болж таарах нь хэвийн үзэгдэл үү? Нэг бүл болон гэр бүл хамаатан садан ах дүүсээс хэн ч газар өмчлөөгүй, аз таараагүй байхад  зарим гэр бүл дөрөв тавуулаа газар авчихжээ. Мөн дөнгөж төрсөн болон бага насны хүүхдүүдэд олноор эрх олгосон байна.

Тэгэж байхаар амьдралд хөлөө олох гээд ядаж яваа залуусыг дэмжиж улсаас өгөх ёстой үнэгүй газарыг нь олгосон бол юутай сайхан вэ. Анхнаасаа эгэл бор амьдрал мэдэхгүй, хэнд газар хамгийн чухал болохыг ойлгоогүй энгийн амьдралаас хол тасарсан дарга нарын шийдвэр нүдээ толсонгүй ээ. Ухаалаг систем гэж хүний гарын үзүүрээр өөрчлөх боломжтой программд гүнээ итгэдэг яасан “ухаан муутай” дарга нар вэ. Мэдээлэл болон программыг яаж ч өөрчилж болдог цаг ирсэн гэдгийг мэддэг ухаантан байдаг ч болоосой. Зах замбараагүй болсон газар хуваах ажлаа эргэн нэг харвал яасан юм бэ.  

Н.Ганаа