Буриадад цэрэг татлага дуусаж, оросууд нутагтаа харина

ОХУ-ын Ерөнхийлөгч В.Путин есдүгээр сарын 21-нд хэсэгчилсэн дайчилгаа зарласнаас хойш Оросын иргэд олноороо эх орноо орхин гарч байгаа. Манайд ч бас орос иргэд бөөнөөр ирснээс хотын гудамжаар урьд өмнө үзэгдэж байгаагүй олон орос хүн харагдах боллоо. Хотын зочид буудлууд пиг дүүрч, ковидийн үеэс хойш анх удаа бүрэн хүчин чадлаар ажиллаж эхэлжээ. ОХУ-ын иргэд Монголд 30 хоног визгүй аялах эрхтэй бөгөөд зохих бичиг баримтыг бүрдүүлбэл 60 хоног оршин суух боломжтой.

Харин энэ урсгал эргэн буцах шинжтэй болжээ. Буриадын тэргүүн Алексей Цыденов саяхан хэсэгчилсэн дайчилгаа амжилттай өндөрлөснийг зарлалаа. Цэрэг татлагын цэгүүдийг буулгаж, комиссын гишүүд жирийн ажилдаа эргэн орсон байна. Ингэснээр цэрэгт татагдаж, дайнд явна гэсэн аюул осолгүйгээр нутагтаа буцах боломжтой болсон байна.  

Буриадын хүний эрхийн зүтгэлтэн Юлия Жамбалова “New Media Group”-т ярилцлага өгөхдөө “Гадаадад гарсан манай иргэд хэрхэн буцах талаар надаас их зөвлөгөө авч байна. Тэд ямар нэг ял шийтгэл хүлээхээс айж байгаа юм” гэж хэлсэн байна.

Сенатор Андрей Климов “Манай Үндсэн хуулиар иргэн хүн ОХУ-ын нутаг дэвсгэрт чөлөөтэй гарах, орох эрхтэй. Дайчилгаа эхэлснээс хойш гадаадад гарсан хэн ч байсан ОХУ-ын ямар нэг хууль дүрмийг зөрчөөгүй бол эх орондоо эмээх зүйлгүй эргэн ирж болно. Хэрэв хууль зөрчсөн бол холбогдох албаныхан шалгах ёстой. Хэрэг хийгээгүй ч дайчилгаанаас зугтсан хүн болгон ёс суртахууны хариуцлага хүлээнэ. Эх орноо аюулд орхиод зугтана гэдэг том асуудал. Гэхдээ зугтсан хүмүүсээр эх орон нь дутахгүй. Жилийн өмнө ОХУ 146 сая хүн амтай байсан бол одоо 150 сая хүн амтай болсон. Донецк, Луганск, Херсон,  Запорожь бидэнтэй нэгдсэн” гэж мэдэгдлээ.