Сансрын урт нислэг тархины ховдлын хэлбэрийг өөрчилдөг байна

Я.Болор | Zindaa.mn
2023 оны 06 сарын 09

Удаан хугацааны сансрын аялал хүний тархинд үзүүлдэг шинэ нөлөөг эрдэмтэд илрүүлжээ.

Флоридагийн их сургуулийн мэдээлснээр, эрдэмтэд сансрын нисэгчдийн тархийг нислэгээс өмнө болон дараа нь MRI тусламжтай шинжилжээ. Судалгаанд оролцсон 30 сансрын нисэгчээс найм нь хоёр долоо хоног, 18 нь зургаан сар, дөрөв нь нэг жилийн хугацаанд сансарт ажилласан байна. Судалгаагаар сансарт зургаан сараас дээш хугацаанд ажилласан сансрын нисэгчдийн тархины ховдлын хэлбэр ихээхэн өргөжжээ. Хүмүүс сансарт удаан хугацаанд байх тусам тархиных нь ховдол томорсон болохыг эрдэмтэд тогтоосон байна. Ихэнх сансрын нисэгчид нэгээс илүү удаа сансарт ниссэн ба судалгаанаас үзвэл тархины ховдол хэвийн хэмжээнд эргэн ороход ойролцоогоор гурван сар шаардагддаг байна.

Тархины ховдол нь хоорондоо холбоотой хэд хэдэн хөндий ба эдгээр хөндий нь тархи нугасны шингэнээр дүүрсэн байдаг аж. Ховдлуудын гол үүрэг нь тархийг хамгаалах, тэжээлээр хангаж, тархинаас хэрэггүй “хог хаягдлыг хөөдөг байна. Хүний бие организм шингэнийг жигд биеэр тараадаг ба таталцах хүч үгүйд биеийн шингэн дээд хэсэг рүү орж, тархийг гавлын дээд хэсэг рүү түлхсэнээр ховдол өргөждөг байна. Тиймээс хүн олон сараар бусад гараг руу нисэхэд энэ асуудлыг хэрхэн шийдвэрлэх арга замыг хайх шаардлагатай гэж эрдэмтэд онцолжээ.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top