Олон Улсын эрүүгийн шүүхийн эсрэг хориг тогтоохыг зарлигджээ

АНУ-ын ерөнхийлөгч Доналд Трамп Олон улсын эрүүгийн хэргийн шүүхийн эсрэг хориг тогтоох тухай зарлигт гарын үсэг зурсан байна.

Цагаан ордны албан ёсны төлөөлөгчийн сэтгүүлчдэд мэдээлснээр, Америкийн засаг захиргаа Олон улсын эрүүгийн хэргийн шүүхийг АНУ болон Израил зэрэг түүний холбоотнуудын эсрэг хууль бус үйлдэл гаргасан хэмээн буруутгаж байгаа ажээ. “Олон улсын эрүүгийн хэргийн шүүх АНУ болон манай ойрын холбоотон Израилын эсрэг чиглэсэн хууль бус, үндэслэлгүй үйлдэл гаргаж байна хэмээн АНУ-ын ерөнхийлөгч Доналд Трамп миний бие үзэж байна.

Олон улсын эрүүгийн хэргийн шүүх Америкийн иргэд болон Израил зэрэг манай зарим холбоотны эсрэг хууль ёсны үндэслэлгүй урьдчилан мөрдөн шалгах ажиллаа явуулж, бүрэн эрхээ урвуулан ашиглан Израилын ерөнхий сайд Биньямин Нетаньяху болон тус улсын Батлан хамгаалахын сайд асан Йоав Галант нарыг баривчлах зөвшөөрлийг олгосон билээ” гэж уг зарлигт онцолсон байна.

Дээр дурдсан мөрдөн шалгах ажиллагаанд оролцсон Олон улсын эрүүгийн хэргийн шүүхийн ажилтнуудын эсрэг санхүүгийн болон визийн хориг хэрэглэх боломжийг уг зарлиг олгож байгаа аж.