АНУ-ын засаг захиргаа ОУЭШ-ийн шүүгч Д.Эрдэнэбалсүрэнд хориг тавилаа

АНУ-ын Ерөнхийлөгч Доналд Трампын засаг захиргаа Олон улсын эрүүгийн шүүхийн хоёр шүүгчид хориг тавьж буйгаа зарлалаа. Хориг тавьж буй хоёр шүүгчийн нэг нь Монгол Улсын иргэн ОУЭШ-ийн Давж заалдах шатны шүүгч Д.Эрдэнэбалсүрэн, нөгөө нэг нь Гүржийн иргэн шүүгч Гожа Лорккипанидзе нар аж.

Ийнхүү хориг тавьснаар тус хоёр шүүгчийн АНУ руу зорчихыг хориглох, АНУ-ын харьяаллын дагуу хөрөнгийг царцаах зэрэг арга хэмжээ авах юм байна.

АНУ-ын засаг захиргаа Олон улсын эрүүгийн шүүхийг Газын зурваст явуулж буй Израилийн талын цэргийн ажиллагаа нь улс төрийн гэмт хэрэг гэж үзэн, мөрдөн шалгах ажиллагаа явуулах шийдвэртэй нь холбоотой аж.

АНУ-ын Төрийн нарийн бичгийн дарга Марко Рубиогийн албан ёсны мэдэгдэлд дурдсанаар “ОУЭШ нь Израил руу чиглэсэн улстөржсөн шийдвэрүүд гаргасаар байгаа нь олон улсын хувьд аюултай жишиг тогтоож байна. АНУ болон Израилийн тусгаар тогтнолыг зөрчиж, дээрх хоёр улсын зөвшөөрөлгүйгээр ОУЭШ шийдвэр гаргах, эрх мэдлээ урвуулан ашиглахыг тэвчихгүй” гэсэн байна.

Олон улсын эрүүгийн шүүхийн Ромын дүрэмд оролцогч талуудын ассамблейн 22 дугаар чуулган 2023 оны 12-р сарын 4-14-ний өдөр Нью-Йорк хотноо болж, улмаар Монгол Улсын иргэн Д.Эрдэнэбалсүрэн 81 орны саналаар тус шүүхийн Давж заалдах шатны шүүгчээр сонгогдсон юм.

Олон улсын эрүүгийн шүүх нь Газын зурвасын нөхцөл байдалтай холбогдуулан 2024 оны 11 дүгээр сарын 21-ний өдөр Израилийн Ерөнхий сайд Беньямин Нетанъяху, Батлан хамгаалахын сайд асан Йоав Галлант нарыг хүн төрөлхтний эсрэг гэмт хэрэг үйлдсэн гэх үндэслэлээр баривчлах шийдвэр гаргасан юм.