Э.Бат-Үүл хувьчлал явуулах шийдвэр гаргасан албан хаагчдыг шалгуулна

Нийслэлийн Өмчийн харилцааны газрын дарга Ш.Төмөрбаатар Улаанбаатар хотын төвийн дөрвөн дүүргийн Тохижилт үйлчилгээний компаниудад  шалгалт хийжээ. Тус компаниуд хувьчлагдсан гэх боловч нийслэлийн төсвөөс санхүүжилт авсан хэвээрээ үйл ажиллагаа явуулж байгаа юм байна. Шалгалтаар эдгээр компаниуд нийслэлийн төрийн захиргааны өмнө хүлээсэн үүргээ биелүүлээгүй нь тодорхой болжээ. 

 Уг нь ТҮК-иудыг 2003 онд менежментийн багт гэрээгээр ажиллуулахаар шилжүүлжээ. Улмаар уг гэрээг дүгнээд хувьд шилжүүлэх шийдэлд хүрчээ. Харин төрийн өмчийг менежментийн багт шилжүүлэх үйл явцыг 10 жилд багтаан шийдвэрлэхээр гэрээ байгуулсан байна. Энэ гэрээнд нийслэлийн өмнө хүлээсэн үүргээ биелүүлээгүй тохиолдолд хувьчлах шийдвэрийг Нийслэлийн өмч хувьчлалын комисс хүчингүй болгох заалт оруулжээ. Нийслэлийн өмчийн харилцааны газрын шалгалтаар нийслэлийн төр, захиргааны байгууллагын өмнө хүлээсэн үүргээ биелүүлээгүй нь тогтоогджээ. Тйимээс, нийслэлийн өмчийн харилцааны газар  хувьчлалыг хүчингүй болгох санал оруулжээ. Гэрээгээр хүлээсэн үүргээ биелүүлээгүйн дээр ТҮК хувьчлалыг явуулахдаа хууль зөрчин хийсэн болох нь тогтоогдсан байна. Иймд нийслэлийн Засаг дарга Э.Бат-Үүл хууль зөрчиж хувьчлал явуулах шийдвэр гаргасан тухайн үеийн албан хаагчдыг хууль хяналтын байгууллагад шалгуулахыг Нийслэлийн өмчийн харилцааны газрын дарга  Ш.Төмөрбаатарт сануулсан талаар Нийслэлийн хэвлэл мэдээлэл, олон нийттэй харилцах хэлтсээс мэдээллээ.