Сэрэмжлүүлэг хүргэлээ

Сар шинийн баяр ойртож байгаатай холбогдуулан цагдаагийн байгууллагаас дараах зөвлөмж, сэрэмжлүүлгийг иргэдэд хүргэж байна.

 -Сар шинийн баярын өдрүүдэд архи, согтууруулах ундааны худалдаа, борлуулалт нэмэгдэж байгааг далимдуулан эрүүл ахуйн шаардлага хангаагүй, стандартын бус, хямд үнэтэй бүтээгдэхүүн үйлдвэрлэж борлуулах, худалдаалах хэрэг, зөрчлөөс урьдчилан сэргийлэхэд цагдаагийн байгууллага анхааран ажиллаж байна.

 -Иймд иргэд, аж ахуйн нэгж, байгууллагууд архи, согтууруулах ундаа, хүнсний бүтээгдэхүүнийг худалдан авахдаа баталгаатай, эрүүл ахуйн шаардлага хангаж байгаа тухай дүгнэлт, шинжилгээний бичгийг үзэж худалдан авах.

 -Хуурамч, баталгаагүй хямд архийг хүн ам олноор төвлөрсөн захад /Нарантуул, Хархорин, Баянзүрх гэх мэт/ зарлал мэдээллийг нууцаар тарааж нийслэл хотын захын дүүрэгт байрлах агуулах, сав, контейнероос шөнө оройн цагаар их хэмжээгээр ачиж хөдөө, орон нутагт аваачин зарж борлуулах хэрэг гарч байсныг анхаарах хэрэгтэй.

 -Сар шинийн баяр ойртоход орон байр, халаасны хулгайн гэмт хэрэг гарах нь нэмэгдэх хандлагатай байдгийг анхаарч өмч, хөрөнгөндөө тавих хяналтаа сайжруулж, ялангуяа хөдөө орон нутгийн иргэд нийслэлийн томоохон худалдааны зах, дэлгүүрээр явахдаа халаасны хулгайн болон залилан мэхлэх гэмт хэргээс урьдчилан сэргийлэхэд анхаарах.

 -Мал хулгайлах гэмт хэрэг хөдөө орон нутагт өсөх төлөвтэй байгааг анхаарч малыг байнгын хариулга, маллагаатай байлгах,

 -Нийслэлээс болон орон нутгаас гарч явахдаа тээврийн хэрэгслийн бүрэн бүтэн байдлыг хангаж, хурдыг тохируулж, аюулгүй байдлаа хангах

 -БНХАУ-д зорчин худалдаа, наймаа хийж байгаа иргэд хуурамч юанийг хариулт мөнгөнд авахаас сэргийлэх,

-Галын аюулаас урьдчилан сэргийлэхэд цахилгааны шугам, хэрэгслийн бүрэн бүтэн байдлыг ханган, гал алдахаас сэргийлэхийг зөвлөж, сэрэмжлүүллээ.