Дөрвөн сарын 1-ний наргианаасаа болж эрүүгийн хэрэгт шалгагджээ

Өнгөрөгч дөрөвдүгээр сарын 1-нд ОХУ-ын Новосибирь мужийн  төмөр замын Тогучин өртөөний цагдаагийн хэлтэс рүү хэн нэгэн утасдаж “Тогучин-Новосибирск” чиглэлийн цахилгаан галт тэргэнд тэсрэх бөмбөг байгаа тухай хэлжээ. Ингээд мэдээллийн дагуу тээврийн цагдаагийнхан галт тэргийг зогсоон үнэрч нохой авч очин үзлэг хийсэн ч тэсэрч дэлбэрэх бодис олоогүй гэнэ. Мөн “Зорчигчдыг нүүлгэн шилжүүлж, галт тэргийг удаан хугацаагаар саатуулах шаардлага гараагүй” хэмээн цагдаагийн алба мэдээлжээ. Мэргэжилтнүүд тус галт тэргэнд шалгалт хийсний дараа хэн утасдсаныг тогтооход урьд нь хулгай, дээрмийн хэргээр ял эдэлж байсан 27 настай залуу худал мэдээлэл өгсөн нь илэрчээ. Ийнхүү түүнийг саатуулан эрүүгийн хэрэг үүсгэн шалгаж эхэлсэн байна. Дөрвөн сарын 1-ний энэ наргиан нь түүнд гурван жилийн хорих ял өгч магадгүй байна.