Д.Пүрэвдоржийн 7 хоног: Омогшил /шүлэг/

Омогшил  

Униарт хонд шөнөжин тэвэрсэн

Ургуул уулын хайрын увидас

Уурагт энгэр өнжин дэвтсэн

Уялган бэлийн харвуул үндэс

Би бол би.

Хөдсөн өлгийд одтой орчсон

Хөх тэнгэрийн хөх зүүд

 Хөвд өвснөөс аргамж хүйлж

Хөл алдуурсан хорвоогийн нууц

Би бол би.

Эмээлийн дөрөөнд хар дарсан

Эзэнт гүрний бурхан учиг

Элэнцийн буурийг элээж сахьсан

Эх нутгийн буурал өчиг

Би бол би

Өрөөлийн зоргоор өнгөгүй жаргасан

Өчигдрийн хатавчинд баян боол.

Өөрийн эрхээр мөнгөгүй дургисан

Өнөөдрийн хойморт гуйлгачин хаан.

Би бол би.

Гэр амьсаж харь халгасан

Гэрэл сүүдрийн бүүдэн сүлээн

Гэнэн сүсэгтний зуланд шандсан

Гэм буяны тарлан шүтээн

Би бол би Хорьдох зууны цаазын хаадыг

Хоймортоо тахьсан буруу номтон

Хоол голж, хормой шилж

Хорвоод төөрсөн нүгэлт хоноц

Би бол би

Улалзахад минь үгүйсгэв гэвч

Унтрахад минь намайг үгүйлнээ.

Унаган хүү нь илүүгүй л юм бол

Улс надаар дутахаа л дутнаа.

Би бол би

Хэн нэгэн дудрайн хэлснээр

Хэрэв би нохой юм бол

Монгол улсаасаа уянтай

Модон идүүртэй угаадас гай шүү.

Би бол чи биш

Би бол би!

Zindaa.mn-Чөлөөт мэдээллийн портал