АНХААР: Хонконг Каннабидиолийг аюултай эмийн жагсаалтад оруулжээ

Автор | Zindaa.mn
2023 оны 02 сарын 03

Хонконгийн Аюулгүй байдлын хорооны Хар тамхитай тэмцэх хэлтэс Каннабидол (CBD)-ыг аюултай эмийн жагсаалтад оруулж байгаагаа албан ёсоор мэдэгдлээ.  Сүүлийн жилүүдэд энэ төрлийн бодис агуулсан бүтээгдэхүүнийг өвдөлт намдаах, нойргүйдлийг эмчлэх, арьс арчилгаанд тустай хэмээн сурталчилж, олон нийтийн дунд түгээмэл хэрэглэгдэх болсон. Хонконгийн мэргэжилтнүүд Каннабидолыг олсны төрлийн ургамал каннабисаас гаргаж авдаг тул донтолт үүсгэж, хий зүйл харах, сэтгэцийн эмгэг үүсгэх, сэтгэл санааг хямралд оруулах аюултай хэмээн үзэж байна.

Саяхан Хонконгийн Аюултай эмийн тухай хуульд тодорхой нэмэлт өөрчлөлт оруулж, аюултай эмийн жагсаалтад “Каннабидол”-ыг багтаасан бөгөөд 2023 оны хоёрдугаар сарын 01-ний өдрөөс эхлэн хүчин төгөлдөр хэрэгжиж эхлэв.



Нэмэлт өөрчлөлт ёсоор “Каннабидол”-ыг хэрэглэвэл долоо хүртэлх жилийн хорих ял оноож, 1 сая хонконг долларын торгууль ногдуулах бол энэ төрлийн бодисыг хууль бусаар үйлдвэрлэж, худалдаалбал бүх насаар нь хорих ял оноож, 5 сая хонконг долларын торгууль ногдуулах заалттай болж байна.

Иймд Монгол Улсын иргэд Хонконгийн хилээр нэвтрэх, оршин суух хугацаанд энэ төрлийн бодис агуулсан хүнс, гоо сайхан болон эм, эмийн бүтээгдэхүүнийг биедээ авч явах, хэрэглэх, хадгалахгүй байхыг сэрэмжлүүлье.

МОНГОЛ УЛСААС БНХАУ-ЫН ЗЗОБ ХОНКОНГТ СУУГАА ЕРӨНХИЙ КОНСУЛЫН ГАЗАР 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top