ОЛОН ӨНГӨ: Ард нь улсаа бодож, авлигачид нь цөлмөж байна

Монгол Улсад худлаа хэлж, хулгай хийсэн нь мөнгөтэй амьдарч байна, Энэ улсаас л явж байвал гэх үг сүүлийн үед их хэрэглэгдэх болов. Үнэхээр ч ард түмнийх нь амьдрал өдрөөс өдөрт уруудаж, бөөнөөрөө “Ул”-ных болж, өргөн хэрэглээний бараа бүтээгдэхүүний үнэ өдрөөр бус цагаар нэмэгдэж байгаа болохоор арга ч үгүй биз. Дээрээс нь улс орны эдийн засгийг сэвхийтэл босгоод ирэх томоохон төсөл хөтөлбөр, үйлдвэр, уурхайнуудаа улстөрчид, албан тушаалтнууд, мэдээлэлд ойр байснууд нь цөлмөчихсөн.

Эхнээсээ зарим нь яллагдагчаар татагдаж, эрэн сурвалжлагдаж, улсын хилээр гарахаа хориулж байна. “Эрдэнэс Тавантолгой” компанийн 1072 ширхэг хувьцааг ард түмэндээ тарааж, уран үгсээр улстөрчид нь ам уралдан донгодож байсан ч 2021 онын ногдол ашиг нь 15, 2022 оных нь ашиг иргэн бүрд 10 мянган төгрөг оногдохоор хэмжээнд байгаа гэв.

Гэтэл нөгөө талд нь “Нүүрсний хулгай”-д нэр холбогдсон таван гишүүн “Иргэн бүрд хоёр сая төгрөг өгөх боломжтой” гэсэн мэдэгдэл хийж, зарим нэгнийх нь хорхойг гозолзуулав. Уг нь тэд л ногдол ашгийн хувь хэмжээ хэд оногдохыг мэдэхгүй байв гэж. Харамсалтай нь тэд өөрсдийн албан тушаалаа хадгалж үлдэхийн тулд мэдлэг, мэдээллээр хомс массыг уруу татах, өөрсдийнхөө асуудлыг мартагнуулах арга олсон нь энэ. Гэвч улстөрчдийн аргыг сайн мэддэг болсон хэрсүү ард түмэн түүнийг нь үл ойшоон “Мөнгө тарааж хэрэггүй” гэх болов. Үүнээс харахад улстөрчид нь улсаа тонон дээрэмдэх, хагалан бутаргах бодолтой, “Ул”-ных болсон ард түмэн нь нь улсаа өндийгөөсэй, өсөөсэй, хөгжөөсэй гэж хүсдэг нь харагдаж байна.

Эх сурвалж: ӨГЛӨӨНИЙ СОНИН