Туулай жил туг ч барина тугал ч хариулна гэжээ

Монголчууд бид алдаа, онооны тэн тэнцүүлж хураасан “Сайжруулагч” хэмээх бар жилээ түүх болгон үлдээж, айсуй “Үзэсгэлэнт болгогч” хэмээх туулай жилтэй учран золгоход арваадхан хоног үлджээ.

Ертөнцийн цас нартай буулганд цаг наргүй зүтгэсэн хөдөлмөрч зон олны маань нэгэн жилийн ажлаа дүгнэж, алдаа оноогоо цэгнэх торгон мөч иржээ. Үг, үйлдэл бүхнээс нь утга учир сацарсан туулай жилдээ бар жилийнхээ  алдааг орхиж, оноо бүхнээ бататгахаар төлөвлөж байгаад эргэлзэх юун.

Төв Азийн өндөрлөгт орших монголчууд бид аливаа зовлон бэрхшээлийг өөрийн сэтгэлийн хат, зориг тэвчээр, хөдөлмөрийн үрээр давж ирсэн аугаа түүхтэй ард түмэн. Гагцхүү бид эрүүл энх, айл хотол, аймаг сумаараа, улс орноороо эвтэй найртай байх учиртайг туулай жил сануулан ирж байна.

Айсуй он цагт бидний ажил, амьдралын ололт амжилт угтан буй учраас эрүүл энх байж, хүссэн бүхэн тань сэтгэлчлэн бүтэж таарна. Ямартай ч “Үзэсгэлэнт болгогч” туулай жил нь өвгөд хөгшдөд буюу өндөр дээд суудалтанд сайн, залууст буюу дунд суудалтанд дунд, нялхаст буюу түмэн олонд муу байна. Улс орны хөгжил дэвшил саарах, өндөр албан тушаал эрхэлж буй хүмүүсийн суурь батжих, дээд хүмүүст гэм их, иргэдэд хатуу хууль цааз ирнэ хэмээжээ. Ерөнхий зурлагаас харж байхад туулай жилд ард түмэн “Туг ч барина, тугал ч хариулна” гэдэг шиг зүйл болох нь.

Эх сурвалж: ӨГЛӨӨНИЙ СОНИН