ОЛОН ӨНГӨ: Ахан дүүсийн баяр

2023 оны 03 сарын 01

Цагаан сар гэж

Ямар баяр юм бол

Хүн болгонд үнсүүлдэг

Хацарны баяр юм уу

Аа, мэдлээ мэдлээ

Амар байна уу гэж золгодог

Ахан дүүсийн баяр юм байна... хэмээн жаахан үр минь шулганан жиргэсээр хэд хонов. Мэдээж Монгол түмний уламжлалт сар шинийн баяраас өмнө багш нь цээжлүүлсэн хэрэг. Гайгүй сайн цээжилснийхээ хэргийг ч гаргаж, ахан дүүс маань өхөөрдөн мялааж харагдана. Харин үрийнхээ ийн шулганан яваа шүлгийг сонсон Цагаан сарын тухай анх удаа эргэцүүллээ. Гэвч бодол бодлын хойно ч үнэхээр л “Ахан дүүсийн баяр” ажээ.

Хаврын тэргүүн сарын шинийн нэгэн болохоор л бид аав ижий, ахан дүүсээ зорин очиж, алгаа дэлгэн амар мэндийг нь эрдэг. Ахмад буурлууд маань ч гэсэн хараа тавин хүлээнэ. Хацраа өгөөд үнсүүлэх аав ээжтэй нэгнийг харж, сэтгэл дотроо зарим нь сэмхэн гуниглана. Үүнээсээ үүтгээд дурсамжийн утсаа хөвөрдөн томсоор уртаар санаа алдана. Тэгээд л аавыг нь орлосон авгаа, ижийн энтэй нагацаа хэмээн дээдлэн хүндэлж, дээлийнхээ нударгад нулимсаа нууж, амар мэндийг нь эрэн золгохоор ахан дүүстээ ирдэг билээ.

Эх сурвалж: ӨГЛӨӨНИЙ СОНИН

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top