"Алтан тариа" ХХК торгуулийн мөнгөө хэрэглэгчдээс гаргуулна

Шударга өрсөлдөөн, хэрэглэгчийн төлөө газар (ШӨХТГ)-аас "Алтан тариа" ХХК-д 20 сая төгрөгийн торгууль оногдуулсныг "Үндэслэлгүй" хэмээн үзэж, ШӨХТГ-ыг шүүхэд өгөхөөр болжээ. 

Түүнчлэн "Алтан тариа" ХХК торгуулийн мөнгөө хэрэглэгчдээс гаргуулахаар гурилынхаа үнийг нэмэхээр болсон байна. 

Энэ талааар тус компанийн захирал П.Цэнгүүн "Гурилын үнийг өнөөдрөөс 20₮-өөр нэмэв. Үндэслэл нь төрийн дарамт, шахалт, шантааж. ШӨХТГ гэх өрсөлдөөний эсрэг газар хэрэглэгчдийг хууль бусаар хохироосон, худалдааны арга хэрэглэсэн гэж торгов. Бүх төрлийн татвар, хураамж, торгууль шийтгэлийг хэрэглэгч төлдгийг мэдэхгүй бололтой" хэмээн цахим хуудсаараа мэдэгдлээ.

Үүгээрээ тэрээр тус компани зөрчил дутагдлаа арилгахын оронд төр хэдий чинээ татвар ногдуулж, торгууль тавина тэр хэрээр алдагдлаа хэрэглэгдээс нөхдөг гэдгээ зарлачих шиг боллоо.

Үндэсний үйлдвэрлэгчдээ төрөөс дэмжиж, хөлд нь мөргөхөөс наагуур "аргадаж" байгаа ч зарим томоохон үйлдвэрлэгчид нь хэрэглэгчдэд халтай бодлоготой байгаа нь маргаан дагуулж байна. Үндэсний гэх тодотголтой үйлдвэрлэгчид төрийн дэмжлэгийг багагүй хүртэж байгаа. Тэр дундаа гурил үйлдвэрлэгчид. Хамгийн сүүлийн жишээ гэхэд, дотоодын төмс, хүнсний ногоо, гурилыг НӨАТ-аас чөлөөлсөн билээ.

Түүнчлэн "Алтан тариа" ХХК-ийн Бизнес, Хөгжлийн хэлтсийн дарга Ө.Саруул-Эрдэнэ "Ямар ч компанийн эрхэм зорилго бол ашигтай ажиллах байдаг. Манай компани ерөнхийдөө 10-13 хувийн ашигтай ажилладаг. Үүнийг бид 20 хувь болгох зорилготой байгаа. Дээрх торгууль бол компанийн ашгийг төрөөс хүчээр буулгах дарамт хэмээн үзэж байна. Компани ашигтай ажиллах зорилгоо 20 хувь болгохын тулд гурилынхаа үнийг килограмм тутамд 20 төгрөгөөр нэмж байна" хэмээн хэвлэлд мэдээллээ бататгалаа.

Тус компанийн дээрх шийдвэрийг хэрэглэгчид буруутгаж, өөрт нь ногдуулсан хариуцлагыг хэрэглэгчдийн хэтэвчнээс төлүүлэх нь байж боломгүй үйлдэл. Төрийн шийдвэр үндэслэлгүй бол шүүхээр шийдүүлэх хэрэгтэй гэж шүүмжлэлтэй хандаж байна.