Улсаа цөлмөсөн хүмүүс 200 саяар гавьяат авах юу ч биш

Саяхан мэдээллийн сайтаар “200 саяар гавьяат авчээ” гэсэн мэдээлэл гарч, үе үеийн Ерөнхийлөгч нарын одон тэмдэг зардаг бизнесийн сэжүүрийг хөндсөн байсан. Ийм яриа олны дунд байнга яригддаг ч авлига авч, өгөлцөж байгаа зураг хөрөгтэйгөө мэдээллийн хэрэгсэлд залраагүй л дээ. Тэгээд ч ийм зүйл нууц далд болдог байлгүй. Мөнгө тоолж зургаа даруулна ч гэж юу байх вэ, харин цол тэмдгээ нэг нь зүүж өгч, нөгөө нь зүүлгэж байгаа зураг хөрөг бол давалгаалдаг.

Хөшигний ард 200 саяддаг байсныг  хэн мэдлээ. Сошиал бүгдийн хурууны хурдыг шалгаж, хэн бүхнийг  амыг  нь зад нээснээс хойш мэдээллийн цар хүрээ тэлж ч байх шиг. Нэг нь бодож явснаа бичиж байхад нөгөө нь харсан үзсэнээ шууд палхийтэл хэлж, зарим нь дурсамж хөглөж, бас агсам тавих ч энүүхэнд. Тэдний бичиж байгаагаас дээр өгүүлсэн гавьяат цолыг 200 саяддаг нөхдүүд дотор Богд уулын амыг хэдэн га-гаар нь авсан нэртэй төртэй эрхмүүд зөндөө.

Алдар гавьяа байгуулснаараа дулдуйдаж Улаанбаатар хотын орон сууцуудыг  4-5 өрөөгөөр нь шагналд авч хөлжигсөд өчнөөн. Эрх мэдэл, дарга сайдын ямбыг байнга эдэлж, тэр хэрээр улсын өмч шамшигдуулж,  өөртөө аваад зогсохгүй, ойр тойрныхондоо өгчилгөж, өөр цааш нь зарж үрж, бүр гадаад орнууд руу хүртэл шилжүүлсний зах зухыг мэдэх хүмүүс сөхсөн  нь цөөнгүй. Ийм л Төрийн шагналт, Ардын цолтон, гавьяатуудаар манай улс дүүрчээ.

Соёлын өвийн хулгайч хүртэл Соёлын гавьяат зүтгэлтний тэмдэг энгэртээ зүүчихсэн, төрдөө үнсүүлсэн хэмээн ханхалзаж явах нь бахар­хал биш эмгэнэл биз ээ. Улсаа цөлмөсөн хүмүүс 200  саяар гавьяат авах юу ч биш юм даа.

Ч.ОЛДОХ