Налайх дүүргийн удирдах ажилтнууд шуурхай хуралдлаа

Өнөөдөр дүүргийн удирдах ажилтнуудын ээлжит шуурхай зөвлөгөөн боллоо. Шуурхай зөвлөгөөний эхэнд ЗДТГ-ын мэргэжилтэн Г.Одонтуяа өнгөрсөн 14 хоногийн үүрэг даалгаврын биелэлтийг танилцууллаа.

Өнгөрсөн 14 хоногт дүүргийн Засаг даргаас нийтийн эзэмшлийн гудамж талбай болон авто зам, орон сууц, гэр хорооллын дундах авто зам, аж ахуй нэгж байгууллагуудын ойр орчмын 50 метр хүртэлх цас мөсийг хүргүүлсэн хуваарийн дагуу цэвэрлэж байх, шаардлага биелүүлээгүй аж ахуй нэгж байгууллагад хуулийн дагуу арга хэмжээ авч ажиллах, Монгол Улсын Засгийн газрын 2017 оны “Сахилга хариуцлага, дэг журмыг чангатгах тухай” 01 дүгээр албан даалгаврыг хэрэгжүүлэх, албан тушаалтанд хандаж иргэд, аж ахуйн нэгжээс ирүүлсэн албан бичиг, өргөдөл, гомдлын шийдвэрлэлтэд бүх шатанд анхаарч, дутагдал гаргасан холбогдох албан тушаалтанд тухай бүр хариуцлага тооцож ажиллах зэрэг 5 чиглэлээр үүрэг өгөгдсөн бөгөөд биелэлт 80-85 хувьтай байна.

Үүний дараагаар Эрүүл мэндийн төв, Онцгой байдлын хэлтэс, Цагдаагийн хэлтсээс 14 хоногийн нөхцөл байдлын талаар танилцууллаа. Өнгөрсөн 14 хоногт Эрүүл мэндийн төвийн амбулаториар 4957 иргэн үйлчлүүлсэн бол дүүргийн хүн ам 19 хүнээр бүл нэмжээ. Цагдаагийн хэлтсийн хувьд 126 гомдол, мэдээллийг хүлээн авч ажилласан бол Онцгой байдлын хэлтэс 4 удаагийн гал түймрийн дуудлагаар ажилласан байна.

Мөн дүүргийн удирдах ажилтнуудын шуурхай зөвлөгөөнд Засаг даргын орлогч С.Тунгалаг мал, тэжээвэр амьтан, хашаа, худгийн 2017 оны тооллогын талаар товч мэдээлэл хүргэсэн юм.

Дүүргийн Засаг дарга Ч.Раднаабазар шуурхай зөвлөгөөний төгсгөлд хэд хэдэн үүрэг даалгавар өглөө. Тэрбээр сүүлийн өдрүүдэд цаг агаар огцом хүйтэрч байгаа тул халаалтын хэмийг нэмэх. Олон нийтийн мэдээллийн сүлжээ болон иргэдээс халаалт, дулаантай холбоотой өргөдөл гомдол маш их ирж байгаа учраас мэргэжлийн байгууллагууд өргөдөл, гомдлын шийдвэрлэлтэнд онцгой анхаарах, төсвийн тухай хуулийн дагуу төсвийн жилд өр авлага үүсгэлгүй ажиллах, төсвийг зориулалтын зүйлд зарцуулах, төсвийн сахилга хариуцлагыг сайжруулахад анхаарч ажиллахыг үүрэг болгов гэж Налайх дүүргийн ЗДТГ-аас мэдээллээ.