Утаа арилсангүй, 1 ИХ НАЯД төгрөг "ариллаа"

15 жилийн өмнөх дүр зураг яг хэвээрээ. Өвөл болохоор утаанд бухимдаж, зун нь мартсаар. 

Идэр есийн хүйтэнд автобус хүлээж зогсохдоо даарч, ханиад хүрнэ. Ханиад нь утаанаас болж хүндэрнэ. Хүндэрсэн ханиадаа эмчлүүлэх гэхэд эмнэлэгт ор олдохгүй, шалаар хэвтэнэ. Эм үнэтэй, эмнэлэг ачаалалтай. 

Манай улс утаатай тэмцээд 20 жил өнгөрчээ. Гэтэл бахь байдгаараа. Сүүлийн 15 жилд утааг бууруулах ажилд 1 их наяд төгрөг зарцуулсан гэж бодохоор дэндүү харамсалтай байна. 

Энэ их хэмжээний мөнгөний зарцуулалтыг эргэж харъя. 

2008 оноос хойш нийт 1 их наяд төгрөгийг агаарын бохирдлыг бууруулахад зориулж зарцуулжээ. 

2008-2016 онд 550 тэрбум төгрөгийг зарцуулсан. Үүнийг задалбал,

• Улсын төсвийн урсгал зардлаас 97.7 тэрбум төгрөг
• Улсын төсвийн хөрөнгө оруулалтаас 54.9 тэрбум төгрөг
• Нийслэлийн төсвийн хөрөнгө оруулалтаас 9.4 тэрбум төгрөг
• Монгол улсыг хөгжүүлэх сангаас 2.1 тэрбум төгрөг
• Гадаадаас 104.7 сая ам.долларын зээл, 48.6 сая ам.долларын буцалтгүй тусламж
• Улсын төсвөөс Цэвэр агаар сангийн 2011-2015 оны үйл ажиллагаанд 93.4 тэрбум төгрөг зарцуулсан.

2017-2020 онд 456.1 тэрбум төгрөг зарцуулсан байна. Задалбал,
 

• Улс, төсвөөс 273.1 тэрбум төгрөг
• Нийслэлийн төсвөөс 14.1 тэрбум төгрөг
• Гадаад зээл, тусламжаас 168.9 тэрбум төгрөг зарцуулсан гэх тоо, баримт байна.