Н.Энхбаярыг хорьсоноос хойш нэг ч удаа нар салхинд гаргаагүй байна

Монголын хорихуудад өнөөдрийн байдлаар 8000 гаруй хоригдол хоригдож байгаа гэсэн тоо байдаг аж. Үйлдсэн гэмт хэргийн хувьд харилцан адилгүй ч тэдэнд ял эдэлж байх хугацаандаа тодорхой эдлэх эрхүүд байдаг. Тухайлбал, ялтан өдөртөө тодорхой хугацаанд нар, салхинд гарах эрхтэй. Ингэснээр хоригдлуудын биеийн байдлыг хэвийн байлгахад тустай төдийгүй, сэтгэл санаанд ч сайнаар нөлөөлдөгийн мэргэжлийн хүмүүс хэлдэг. Тэгвэл ялтан гэх нэрийг зүүснээсээ хойш эл эрхээ эдэлж чадаагүй ганц хоригдол байгаа нь Н.Энхбаяр гэнэ. Түүнийг хорьсоноос хойш дамжин өнгөрүүлэх 401 дүгээр хорих ангиас хуучнаар Ганц худаг руу, дараа нь Ганц худгаас 401, 401-ээс Хоёрдугаар эмнэлэгийн хооронд зөөснийг эс тооцвол ямар нэг байдлаар нар салхинд гаргаагүй байна. Ялангуяа, Н.Энхбаярын биеийн байдал муудаж, эсийн задрал гэсэн оношоор Mонголд эмчлүүлэх боломжгүй болчихоод байгаа нь ч нар салхи үзүүлэлгүй нааран дээр нь хорьсонтой холбоотой байхыг үгүйсгэхгүй байгаа аж. Хүний амь хөнөөсөн, бусдын эрх чөлөө, эд хөрөнгөд халдсан гээд хүнд гэмт хэрэгтнүүд хүртэл нар салхинд гардаг байтал экс Ерөнхийлөгчийг ийнхүү гаргахгүй байгаа нь цаанаа улс төрийн зорилготой гэж хардах хүмүүс ч байна. Ер нь агаар салхинд гаргах нь эм зүйн талаасаа маш чухал эмчилгээнд тооцогддог гэнэ. Тиймгүйсэн бол хотынхон агаар салхи, рашаан сувилалд явахыг чухалчлахгүй нь хэнд ч илэрхий зүйл. Тийм ч учраас Н.Энхбаярын биеийн байдлын талаарх дүгнэлтдээ Хоёрдугаар эмнэлгийн эмч нар нар салхинд гаргахыг зөвлөсөн байдаг ч хараахан хэрэгжээгүй байгаа аж. Хүний эрхийн чиглэлээр мэргэшсэн мэргэжилтнүүд болоод, Н.Энхбаярын намынхан эл байдлыг, “Монголын нийгэм дэх хамгийн аймшигтай харгислал” гэж тодорхойлж байгаа бололтой. Ингэж хэлэх ч үндэслэл нь хангалттай байгаа гэнэ. Тухайлбал, Н.Энхбаярыг яллаад буй хэргүүдийг үндэслэлгүй, хилсээр хэрэгтэн болгосон буюу улс төрийн хэлмэгдүүлэлт гэж МАХН-ынхан үзэж байгаа бөгөөд “Шударга ёсны аян-2013”-аараа улс төрийн хэлмэгдүүлэлтийн эсрэг тууштай тэмцэхээ илэрхийлээд байгаа билээ.