Говь-Алтайн Засаг дарга 1,4 тэрбумаар өөрийнхөө зургийг рекламдаж байна

 Говь-Алтай аймгийн ундны цэвэр усны асуудал сүүлийн  жилүүдэд улам бүр хүндэрсээр байна. Алтай, Баян-Уул, Тонхил, Бигэр гэгчлэн тус аймгийн уул уурхайн баялаг ихтэй, судлагдсан ордуудтай сумдын иргэд усны хомсдолоос гадна хүнсний наад захын шаардлага хангахгүй ус хэрэглэсээр олон жилийн нүүрийг үзэж байгаа юм. Аймгийн төвийн айл өрхүүдийн хэрэглэж байгаа усны кальци, магнийн харьцаа алдагдсан, хлор байх ёстой хэмжээнээс дэндүү их байгаас шар өвчин байнга дэгддэг, ходоод, гэдэс, дотрын өвчлөл их байдаг байна. Усны хайгуул хийсэн ч хоол унданд хэрэглэх хэмжээний ус олддоггүй. Хамгийн ойр нь аймгийн төвөөс 60 км зайтай Завхан гол. Тиймээс Говь-Алтай аймгийн сэргэлэн нь дэндсэн Засаг ноён О.Амгаланбаатар Завхан голоос ундны ус зөөх "Эрүүл ус" нэртэй төсөл хэрэгжүүлж, тэгэхдээ өөрийнхөө зургийг ч рекламдаад эхэллээ.

Тэрбээр Завхан голын эрэг дээг жижиг байшин бариад, тэндээ Завхан голын усыг 20 литрийн баллонд савлан аймгийн төвд рүү машинаар зөөн зарж байгаа аж. Гайхалтай нь тэрбээр энэ ажлыг  төсвийн 1,4 тэрбум төгрөгөөр хийж байгаа ч цэвэр усны шошго дээр өөрийнхөө зургийг хэвлүүлсэн нь зарим хүний инээдийг хүргэж, зарим хүний ундууцлыг барж байна. Энд нийт 20 мянган цэвэр усны баллон байгаа бөгөөд баллоныг нэг хэрэглээд хаядаггүй, дахин дахин ашигладаг. Тиймээс аймгийн Засаг дарга О.Амгаланбаатарын ариун дүрийг алтайчууд ус уух болгондоо харах болж байна. Энэ цэвэр усыг худалдаанд гаргах нээлтийн ажиллагаа хоёр өдрийн өмнө болжээ. Нээлтэнд Аймгийн ИТХурлын дарга А.Дэлгэржаргал, Засаг Дарга О.Амгаланбаатар, МҮОНРТелевизийн захирал  Ц.Оюундарь, аймгийн аварга малчид, тэргүүний тариаланчид, алдарт уяачид нээлтийн үйл ажиллагаанд оролцож, тууз хайчилж. Усны шошго дээр "Говь-Алтай аймгийн АН-ын дарга" гэж тодоос тод бичсэнийг нь бодоод АН-ын генсек асан Ц.Оюундарь нээлтэд нь очсон юм байлгүй дээ.

 Энэ тухай Говь-Алтай аймгийн сайт дээр тун бахархалтайгаар Засаг ноёны тарааж буй усыг тэнгэрийн хишиг мэт “хүртэж” байгаа харчуудын зурагтай мэдээ гарчээ. Савтай уснуудаа эрийтэл нь өрөөд, наана нь бяцхан урлагийн тоглолт хийхээ О.Амгаланбаатар бас мартаагүй байна. Ийм нэгэн марзан нээлт болоод өнгөрлөө. Харин үүний ард төсвийн 1,4 тэрбум төгрөг, Засаг ноёны малийсан зургийн асуудал хөндөгдөж байна.

Усны асуудалд ороод байгаа Говь-Алтайн иргэдэд цэвэр ус хүргэж байгааг шүүмжлэх аргагүй ч өөрийнхөө малийсан зургаа тавих нь хэр зохимжтой хэрэг вэ? Сонгуулийнн сурталчилгаагаа ингэж төрийн мөнгөөр ил цагаанаар хийж болдог л юм байх даа? Ичмээр юм.

Т.Гэрэл