Рио Тинто авлигын хэргээр шалгагдаж буй Сем Уолшд урамшуулал олгоно

Рио Тинто компанийн удирдлагууд авлигын хэргээр шалгагдаж буй өмнөх захирал Сем Уолшд долоон сая австрали долларын урамшуулал олгохоор шийдвэрлэжээ.

Хэдийгээр авлигын хэргээр шалгагдан мөрдөн байцаалтын ажил дуусаагүй байгаа ч ийнхүү 2017 оны гүйцэтгэлийг харгалзан гүйцэтгэх захиралд олгох ёстой төлбөрийг хойшлуулсантай холбоотойгоор ийнхүү урамшуулсан байна.

Сем Уолш нь 2013 онд Рио Тинто компанийн гүйцэтгэх захирлаар томилогдож, гурван жилийн дараа тэтгэвэртээ гарсан билээ. Түүнийг тэтгэвэрт гарсны дараа компанийн захирлын эрх мэдлээ ашиглан бусдад авлига өгсөн гэх хэрэг босож ирсэн юм.

Түүнийг Гвиней улсад хэрэгжүүлдэг “Симанду” төслийг хэрэгжүүлэхдээ авлига өгсөн гэж үздэг билээ.

Харин шалгагдаж буй авлигын хэрэг нь эцэслэн шийдвэрлэгдсэний дараа түүнд нийт 17 сая австрали долларын урамшуулал олгох юм.

Гэвч Их Британийн онц ноцтой залиланг мөрдөн шалгах хэлтэс, Австралийн Холбооны цагдаагийн газар Рио Тинто компанийн дээрх үйлдлийг эрс шүүмжилж буй аж.

Хэрэв Рио Тинто компанийг Сем Уолш удирдаж байх үед авлигын эсрэг хууль зөрчсөн нь тогтоогдвол тус компанийг их хэмжээний торгууль хүлээж байгаа юм.

Дээрх ээдрээтэй “Симанду” төслийн 45 хувийг 2018 онд БНХАУ-ын төрийн өмчит Хөнгөн цагааны корпорацад шилжүүлэх гэрээ нь холбогдох хууль тогтоомж зөрчсөн гэж хууль сахиулагчид үзэж байгаа аж.

Эх сурвалж: Financial Times