Ковид-19 арьсны тууралт хэлбэрээр илэрсэн үү?

Сүүлийн үед бага насны хүүхдийн арьсан дээр идээт тууралт  гарах нь нэмэгдсэн. Энэ нь Ковид-19 халдвартай холбоотой эсэх талаар  Арьсны өвчин судлалын үндэсний төвийн захирал Ц.Уранчимэг мэдээлэл өглөө.

Тэрбээр “Ковид-19 халдвар нь тодорхой хэмжээний арьсны халдвартай хавсарсан өөрчлөлт зарим өвчтөн дээр илэрсэн байна. Арьсны илэрлүүд нь өвчний хүндийн зэрэгтэй холбоотой эсэх нь тодорхойгүй байна. Зарим өвчтөнд ажиглагдсан арьсны илрэл нь ковид-19 эмчилгээнд ашигладаг олон тооны эмийн бодисын хариу урвал байхыг үгүйсгэхгүй. Иймд арьсыг чийгшүүлэх, арьсан дээр гарсан хэсэг газрын эмчилгээ хийх зэрэг аргуудыг сонгож байна” гэлээ.  

Олон хүмүүс хөл хориог тохиолдуулан арьс, гоо заслын ажилбар, эмчилгээнд орж байгаа нь нэг талаар эрсдэлийг үүсгэж байгааг анхаарууллаа. Арьсны хавдартай өвчтөнүүдэд Ковид-19 халдварлах магадлал 3,5 дахин илүү байдаг байна. Мөн өндөр настай хүмүүст хүндрэл нэлээд ажиглагдсан байна. Хятад улс цар тахлын тархалтыг багасгахын тулд зарим гоо сайхны газар, салонуудад хязгаарлалт хийж зөвхөн шаардлагатай ажилбаруудыг л хийх зөвшөөрөл өгчээ.

Ковид-19 халдвартай хавсарсан байдлаар дараах тууралт бүртгэгджээ. Үүнд:
 

• Арьсан дээрх тууралт ихэвчлэн их биеэр гардаг
   
• Мөчдийн зах хэсгээр хөхөвтөр улаан, эсвэл цусархаг толбон тууралт гар хөлийн хуруу тохой тавхайн гадна хэсгээр илэрдэг. Бага зэрэг хаван загатнаа илэрч болно. 2-8 долоо хоног үргэлжилнэ
   
• Судсархаг торлог тууралт, цусархаг үхжилт судсархаг тууралт хүнд хэлбэрийн уушгины үрэвсэлтэй өвчинд илэрсэн байна
   
• Хурц хэлбэрийн чонон хөрвөс
   
• Жижиг цэврүүт болон идээт цэврүүл тууралт Ковид-19 шинж тэмдэг илэрснээс 4-30 хоногт бүртгэгдсэн бөгөөд цэврүүний шингэнийг PCR шинжлэхэд халдвар илрээгүй байна
   
• Улайрал, улайрал төст тууралт, олон төрлийн тууралт хавсран гар хөл, амны салстад гарсан нь Италид өвчилсөн 10 хүүхдээс гадна, АНУ, Их Британид бүртгэгдсэн байна
   
• Хятад улсад Ковид-19 шинж тэмдэг илэрсэн 67 жирэмсний өвчлөлийг судлахад жирэмсэн эхээс төрсөн 2-3 нярайд арьсан дээр толбо гүвдрүүт тууралт тархмал илэрсэн байна.