АНУ-ын 23 мужид үйлчилгээний газруудыг НЭЭХ шийдвэрээ хойшлууллаа

Эрүүл мэндийн яамнаас коронавирусний тархалт, нөхцөл байдлын талаар мэдээлэл хийж байна. /2020.07.03/

ДЭМБ-ын мэргэжилтэн хэлэхдээ “Сүүлийн 24 цагт АНУ-д 53,300 гаруй шинэ тохиолдол бүртгэгдсэнээр нийт халдварын тоо 2 сая 679 мянга гаруй болсноос 128 мянга гаруй хүн эндсэн талаар тус улсын Өвчний хяналт, сэргийлэлтийн төвөөс мэдээлжээ.

АНУ даяар халдвар өргөн хүрээнд тархаж буй учраас 23 мужид үйлчилгээний газруудын үйл ажиллагааг эхлүүлэх шийдвэрээ хойшлуулаад байна. Олон мужид иргэдийг  амны хаалтаа зүүх шаардлагыг тавьж байна.

ОХУ-д халдварын тохиолдол 661 мянга болсноос  9683 нас баралт бүртгэгдээд байна.

Японд 125 шинэ тохиолдол, нэг нас баралт нэмж бүртгэгдлээ. 107 нь Токиод бүртгэгджээ. Дийлэнх нь 20-30 насны залуус байна. Тэдний халдварын зам мөрийг хөөж үзэхэд  баар, шөнийн клубээр үйлчлүүлсэн иргэд байгаа аж.

Австрали улсад 86 шинэ тохиолдол нэмж бүртгэгдлээ. Өнгөрсөн пүрэв гарагаас хойш долоо хоногийн хугацаанд  шинээр 253 тохиолдол бүртгэгдэж, нийтдээ  8001 тохиолдол бүртгэгдээд байна. Нас баралт долоодугаар сарын 2-ны байдлаар 104 байна.