Эхний тунгаа хийлгэсэн 532 хүн халдвар авчээ

Коронавирусний эсрэг вакцинжуулалтад 310 мянга гаруй хүн хамрагдаад байгаа ч эхний тунгаа хийлгэсэн 532 хүн халдвар авсан байна.

Эмч, мэргэжилтнүүдийн мэдэгдэж байгаагаар бол эхний тунг хийлгээд 14 хоноход 40-50 хувийн дархлаа тогтож буй. Хоёр дахь тунг хийлгээд мөн 14 хоноод бүрэн дархлаатай болох аж. Вакцины 2 тунг тариулсан ч маскаа тогтмол зүүж, зайгаа барьж, халдвар хамгааллаа барихыг мэргэжлийн хүмүүс зөвлөсөөр байна.

Халдвар авсан иргэдийн 30 гаруй хувь нь ажлын газраасаа авч байгааг судалгаагаар тогтоожээ. Засгийн газраас дөрөвдүгээр сарын 3-наас вакциныг 2-3 дахин эрчимжүүлж, ААН-үүдийг 15 хоног хязгаарлаж буй нь вакцинжуулалтыг үр дүнд хүргэх нэг үндэслэл юм. 

Улаанбаатар хотын насанд хүрсэн 1 сая иргэнээ дөрөвдүгээр сард вакцины эхний тунг хийж, тавдугаар сараас орон нутагт, мөн нийслэлийн иргэдийг 2 дахь тунг хийж дуустал цаашид сэрэмжээ алдахгүй байхыг уриалж байгаа юм.