Батлагдсан тохиолдлын хавьтлыг ХӨСҮТ, Өрхийн эмч нар тогтооно

---

 

 

-Коронавируст “Ковид-19” халдварт цар тахлын дэгдэлт нийслэлийн ихэнх хороодод тархаж байгаа энэ цаг үед эмчилгээний тактик гэрээр тусгаарлан ажиглах тактик руу шилжиж байна. Энэ хүрээнд өрхийн эмч нарын үйл ажиллагаанд тулгуурласан эмнэлгийн болон эрүүл мэндийн тусламж, үйлчилгээг үзүүлж байна.

 

Халдварын батлагдсан тохиолдол болох тухайн иргэн эмнэлэгт хэвтэн эмчлүүлэх, эсвэл гэрийн тусгаарлан ажиглалтад шилжин эмчилгээ хийлгэх эсэхээ өөрөө шийднэ. Энэ асуудал нь Эрүүл мэндийн сайдын 101 дүгээр тушаалаар зохицуулагдаж байгаа. Гэрээр тусгаарлах боломжтой, гэр бүлийн ахуй нөхцөл бололцоо нь бүрдсэн нөхцөлд тусгай асуулга дээр анкет бөглөж, гарын үсгээр баталгаажуулж өгснөөр тухайн иргэн өрхийн эмчийн хяналтанд эмчилгээ хийлгэх боломжтой юм. Халдварын батлагдсан тохиолдлын ойрын хавьтлыг ХӨСҮТ, Өрхийн эрүүл мэндийн эмч нарын хамтарсан баг тогтооно. Ойрын хавьтлаар тогтоогдсон даруйд шинжилгээ авах, мөн 7 болон 12 дахь хоногт шинжилгээ авах байдлаар нийт гурван удаагийн шинжилгээнд хамруулж, тухайн иргэнийг гэрт нь тусгаарлан, өрхийн эмчийн хяналтад авах зохицуулалтыг журамласан байгаа.

 

-Гэрийн тусгаарлалт, ажиглалтад байгаа иргэдэд үзүүлэх тусламж үйлчилгээний талаар мэдээлэл өгөхгүй юү. Нийт хэчнээн иргэн байна вэ
 

-Өнөөдрийн байдлаар халдварын батлагдсан тохиолдол болох 600 гаруй, ойрын хавьтал 2900 гаруй хүн гэрийн тусгаарлалтад өрхийн эмч нарын хяналт, ажиглалтад байна. АШУҮИС-ийн хоёрдугаар дамжааны 733 резидэнт эмч нар нийслэлийн төвийн дүүргүүдийн 140 гаруй ӨЭМТ-д ажиллаж байна. ӨЭМТ-ийн эмч нар гэрийн тусгаарлалтад байгаа иргэдэд эрүүл мэндийн тусламж, үйлчилгээг хэд хэдэн чиглэлээр үзүүлж байна.

 

Тухайлбал гэрийн тусгаарлалт, ажиглалтад байгаа иргэдтэй өдөрт 2 удаа цахимаар холбогдон эрүүл мэндийн байдал, биеийн халуун болон биед гарч байгаа өөрчлөлтийг асууж байна. Мөн архаг хууч өвчтэй, илүүдэл жинтэй, ахмад настан зэрэг иргэдийг ӨЭМТ-ийн эмчийн шийдвэрээр гэрийн өдрийн эмчилгээнд хамруулахаар болж байна. Эрүүл мэндийн сайдын тушаал, ЭМДЕГ-ын шийдвэрийн дагуу энэ эмчилгээ үйлчилгээний асуудал зохицуулагдана. Гэрийн тусгаарлалт, ажиглалтад байгаа иргэдийн үзүүлэх эрүүл мэндийн тусламж, үйлчилгээг сайжруулах үүднээс явуулын лаборатори ажиллуулж байна. ЭХО, зүрхний бичлэг, рентген оношилгоо, лабораторийн шинжилгээ хийх явуулын багийг өрхийн эмчийн товлолт захиалгын дагуу тухайн иргэний гэрт очиж, тусламж үйлчилгээ үзүүлэх ажлыг зохион байгуулж байна.

 

 

-Тийм ээ, НЭМГ-ын даргын тушаалаар нийтдээ 8 төрөлжсөн мэргэжлийн зөвлөх зэрэгтэй эмч нарын багийг гаргаж, ӨЭМТ-ийн эмч нартай хамтран ажиллуулж байгаа. Ингэснээр гэрийн тусгаарлалт, ажиглалтад байгаа иргэнтэй цахимаар холбогдож, эрүүл мэндийн байдалд нь давхар хяналт тавих боломж бүрдэж байна. Архаг хууч өвчтэй иргэд болон ахмад настнууд халдвараар өвчилсөн тохиолдолд ихэвчлэн хүчилтөрөгчийн хэрэгцээ үүсдэг. Үүнийг хэмжих пульсоксиметр, хүчилтөрөгч өтгөрүүлэгч аппарат, автомат даралтын аппаратыг шаардлагатай бол зарим иргэний гэрт түр хэрэглүүлэх байдлаар эрүүл мэндийн хяналтанд ашиглаж байна.

 

 

-Гэрийн тусгаарлалт, ажиглалтад байгаа зарим иргэдийн хувьд өөр дүүрэг рүү шилжилт хөдөлгөөн хийх зайлшгүй шаардлага тулгарах нь олонтаа. Үүнтэй холбоотой асуудал өдөрт 200 гаруй гарч байна. Халдвартай иргэн болон ойрын хавьтлуудыг ердийн машинаар тээвэрлэж болохгүй учраас товлосон захиалгын дагуу тухайн иргэнийг халдвар хамгааллын дэглэмийг баримтлан, тусгай зориулалтын автомашинаар 09:00-21:00 цагийн хооронд нэг дүүргээс нөгөө дүүрэгт зөөвөрлөх. Мөн тухайн өрхийн эмчээс нөгөө дүүргийн өрхийн эмчийн хяналтанд шилжүүлэх зохион байгуулалтыг хийж байна.

 

 

-Ойрын хавьтлуудын давтан шинжилгээг манай тандалт, шуурхай удирдлагын нэгж хийдэг. Өрх, дүүрэг болгон дээр 1-2 автомашиныг ажиллуулж байна. Хамгаалах хувцас хэрэгсэл өмссөн 4-5 хүний баг товлолт хуваарийн дагуу тандалт, шинжилгээг хийж байна. Түүнчлэн сэтгэл судлалын үндсэн мэргэжлээр суралцаж байгаа 8 резидэнт эмч нарын баг гэрийн тусгаарлалт, ажиглалтад байгаа иргэдэд зориулж сэтгэлзүйн зөвлөгөө, мэдээлэл өгөх цахим сургалтыг өдөрт 2 удаа зохион байгуулж байна. Мөн цахимаар дамжуулан сэтгэлзүйн зөвлөгөө өгөх, амьдралын зөв дадал хэвшилд сургах, гэрийн тусгаарлалтад байх хугацаандаа эрүүл мэнд болон чөлөөт цагтаа хэрхэн анхаарах зэрэг сургалтыг явуулж, иргэдтэй тогтмол харилцаж ажиллана.