ЭМЯ хатуу ХӨЛ ХОРИОГ СУНГАХ саналтай байна

Эрүүл мэндийн яам хатуу хөл хориог сунгах саналтай байгааг ЭМЯ-ны газрын дарга Л.Энхсайхан өнөөдөр (2021.04.19) мэдэгдлээ. 

Тэрбээр “Эрүүл мэндийн яам хатуу хөл хорионы дэглэмийг үргэлжлүүлэх тал дээр бодлого барьж байгаа. Өдөрт илрэх халдварын тохиолдлын тоо буурахгүй байна. Батлагдсан тохиолдлын тоо нэмэгдэх тусам нас баралт нэмэгдсээр байх болно. Нөхцөл байдлын улмаас иргэдийн зүгээс ч хөл хорионы дэглэмийг чангаруулах тухай саналыг Эрүүл мэндийн яамны фэйсбүүк хаяг руу ирүүлж байгаа” гэж ярьсан.

Үүнтэй санал нэгдэхээс ч аргагүй.

Дөрөвдүгээр сарын 10-наас эхлэн улс даяар хатуу хөл хорионы дэглэмж шилжсэн ч халдварын тоо буурахгүй байгаа талаар ХӨСҮТ-ийн Тандалт, судалгааны албаны дарга Ж.Байгалмаа  өнгөрсөн долоо хоногт мэдээлж, "Хөл хорио тогтоосноос хойш өвчлөл саардаг. Хөл хорионы үр дүнг харах хараахан болоогүй байна. Халдварын тоо, эндэгдлийг бууруулах нь хөл хорионы хугацаанаас хамаардаг зүйл. Бид тодорхой тооцооллыг хийгээд явж байгаа. Хатуу хөл хориог ямар хугацаагаар тогтоохоос үр дүн хамаарна. Тархалтын нөхцөл байдлын тооцооллоор 15 хоногийн хөл хорионы хугацаанд халдварын тархалтын үзүүлэлт 1.3 хувь, вакцинд хамрагдаж дархлаа тогтсон хүмүүс 70 хувь гэж тооцвол өвчлөлийн нөхцөл байдал 15 хоногийн дараа ялимгүй буурна. Ингэж ялимгүй буураад эргээд бага зэргийн давлагаа гарахаар харагдаж байгаа. Энэ давлагаа нь долоодугаар сарын сүүл орчмоор буурах тооцоололтой байна. Харин 28 хоногийн хөл хорионы тооцооллыг яг адилхан хийж үзвэл, ойролцоогоор тавдугаар сарын 8 гэхэд халдварын тархалт огцом буурахаар харагдаж байна. Тооцооллоор долоодугаар сарын эхэн гэхэд өвчлөлийн тоо өдөрт 10-аас доош орохоор харагдаж байгаа. Бидэнд халдварыг нэлээд хэмжээнд бууруулах уу, эсвэл эрүүл мэндийн ажилтнууддаа нэг удаа амьсгаа авах чөлөө өгөх үү гэсэн хоёр сонголт л харагдаж байна. Эрүүл мэндийн байгууллагуудын зүгээс аль болох урт хугацаагаар хөл хорио тогтоох шаардлагатай гэж үзэж байна” гэсэн байр суурь илэрхийлснийг эргэн сануулъя.

Хөл хориог сунгаж, 28 хоног үргэлжлүүлбэл тавдугаар сарын 8 гэхэд халдварын тархалт буурч, долоодугаар сарын эхэн гэхэд өвчлөлийн тоо өдөрт 10-аас доош орох тооцоолол гаргажээ.

Өнөөдрийн байдлаар 889 хүн халдвар авсан нь батлагдаж, Монгол Улсад бүртгэгдсэн халдварын нийт тохиолдол 22884 боллоо. Таван хүн нас барж, нас баралт 49 болж нэмэгдлээ. Яг сарын өмнө буюу 2021.03.18-ны үед Монголд нас барсан тохиолдол 4 бүртгэгдээд байсан бол өнгөрсөн сарын хугацаанд 45-аар нэмэгдэж, 49 хүрлээ. Өдөртөө 4-5 хүн нас барах нь хэвийн үзэгдэл боллоо.

Эхлээд хавсарсан буюу суурь, хүнд өвчтөн коронавирусний халдвар авснаар биеийн байдал муудаж, нас баралтын шалтгаан болж байсан бол сүүлийн өдрүүдэд суурь өвчингүй, зөвхөн ковидын хүнд болон нэн хүнд хэлбэрээр нас барсан тохиолдлууд бүртгэгдэж байна.

Тухайлбал, өнөөдөр мэдээлсэн таван тохиолдлын нас барсан шалтгааныг харъя.  
 

• 75 настай эмэгтэй: Дөрөвдүгээр сарын 11-нд онош батлагдаж, "Ачтан" эмнэлэгт хэвтэн эмчлүүлж байсан боловч коронавирусний хавсарсан хүнд хэлбэрийн өвчний улмаас нас барсан.
   
• 55 настай эмэгтэй: Завхан аймгийн Тосонцэнгэл суманд хэвтэн эмчлүүлж байгаад коронавируст халдварын нэн хүнд хэлбэрээр нас барсан.
   
• 34 настай эрэгтэй: БЗД-ийн 4-р хороонд амьдардаг. Дөрөвдүгээр сарын 15-нд халдвар авсан.
   
• 57 настай эрэгтэй: Гуравдугаар сарын 31-нд онош батлагдаж, Цэргийн төв эмнэлэгт эмчлүүлж байгаад коронавируст халдварын нэн хүнд хэлбэрээр нас барсан байна.
   
• 61 настай эрэгтэй: Дөрөвдүгээр сарын 16-нд онош нь батлагдан, ХӨСҮТ-д хэвтэн эмчлүүлж байгаад коронавируст халдварын нэн хүнд хэлбэрээр нас барсан.

Нас барсан таван тохиолдлын гурав нь “Коронавируст халдварын нэн хүнд” гэсэн шалтгаантайгаар хорвоог орхижээ.