Ж.Одгэрэл: Нөхрийнхөө бичлэгийг задруулбал ХОРИНО гэж сүрдүүлсэн

Онцгой байдлын гал унтраах 63 дугаар ангийн алба хаагч Э.Мөнхжаргал өндөр хүчдэлд цохиулж амь насаа алдсан хэрэг гарсан. Талийгаачийн эхнэр Ж.Одгэрэл хэргийг үнэн зөвөөр шийдвэрлүүлэхээр БЗД-ийн Цагдаагийн хэлтсийн үүдэнд суулт зарлаж байсан билээ. Тэгвэл өчигдөр (2021.01.05) хэргийн талаарх шинэ баримт дэлгэхээр хэвлэлийн хурал хийсэн юм. Суулт зарласнаас хойш түүнд олон дарамт шахалт ирж байжээ.

Улиастайн уулзвар дээрх “Монгол Цагдаа 100 жил” нэртэй самбарын замын эсрэг талд ойрын болон холын камерууд байдаг байна. Цагдаагийн байгууллагад холын камерын бичлэг байгаа хэдий ч ойрын камер эвдэрсэн тул бичлэг нь байхгүй хэмээн хэргийн талаар мэдээлсэн. Гэвч ойрын камерны бичлэг хохирогчийн эхнэр болох Ж.Одгэрэлд байсан байна.

Улмаар прокурорт ойрын камерын бичлэгийг нэмэлт баримт болгон өгч, хэргийг хурдан шийдвэрлүүлэхийг хүссэн ч тус хэргийг мөрдөж буй прокурорын зүгээс баримт болгон хүлээн авахаас татгалзсан ажээ.Энэ талаар Ж.Одгэрэл "БЗД-ийн прокурорын газрын хяналтын прокурор Н.Өнөрбаяр уг бичлэгийг олон нийтэд дэлгэвэл хэргийн нууц задруулсан  хэмээн  үзэж, намайг шоронд хорино гэж сүрдүүлсэн. Тэр бичлэгийг нотлох баримтаар хүлээн авч мөрдөн шалгах ажиллагаандаа ашиглах ёстой. Гэвч эрх бүхий хүмүүс баримтыг устгаж, үгүйсгэж байна гэж хардаж байна. Тиймээс энэ бичлэгийг олон нийтэд үзүүлж, нөхрийн минь нэр хүндийг сэргээхийг шаардаж байгаа юм.

Тус бичлэгт талийгаач мэргэжлийн бус жолоочтой хамт явсан. Шатыг доош буулгах ёстой байтал туршлагагүй жолооч дээш өргөж, манай нөхөр тогонд хүчтэй цохиулж, газар дээрээ нас барсан. Үүнийг би өөрийн нүдээр бичлэгээс харсан” гэв.

Тэрбээр "Намайг суулт зарлахад сайд С.Амарсайхан гурав хоногийн дотор асуудлыг шийдэж өгнө гэснээр суултаа зогсоосон. Би тэр гурав хоногт ОБЕГ-аар уучлалт гуйлгаж нөхрийнхөө нэр хүндийг сэргээлгэх, мөн Гал түймэр унтраах 63 дугаар ангийн захирагч, хошууч Д.Ууганбаярыг ажлаас нь түдгэлзүүлэхийг шаардсан. Ийнхүү захиргааны арга хэмжээ аваад 63 дугаар ангийн дарга нарыг ажлаас нь халсан юм. Нөхрийн маань ар гэрээс намайг огт харж байгаагүй гэж худал мэдээлэл хийсэн. Намайг суулт зарлаад хоёр хонож байхад нөхрийн маань гэр бүл яаруу, сандруу хэвлэлийн бага хурал хийсэн нь тэтгэмжийн болон амь насны даатгалын мөнгийг надад олгочих вий гэж айсандаа л байх. Тэрнээс биш нөхрийн минь нэр хүндийг сэргээлгэх байсан бол миний эсрэг тэмцэхгүй байх байсан юм" гэлээ.

Мөн өөрийн нэр төрөө сэргээхээр  Чингэлтэй дүүргийн Цагдаагийн нэгдүгээр хэлтэст нөхрийнхөө гэр бүлийнхний эсрэг гомдол гаргасан байна. Улмаар Ж.Одгэрэл хохирогч болохыг тогтоож эрүүгийн хэрэг үүсгэжээ.

Л.ХОНГОРЗУЛ