СЭДЭВ I Сарнайн 60 сая буюу сенсаци дарах тактик

Нэгэн залуу 60 сая төгрөгөөр сарнай худалдан авч, эхнэртээ хүргүүлсэн талаар ид шуугиж байна. Мөнгөтэй хүн лаагаа иднэ үү, луувангаа иднэ үү падгүй хэмээн өмөөрөх нэг нь байхад баян хоосны ялгаа, өлсгөлөн хонож байгаа хүмүүсийг жишээ татан хараан зүхсэн нь ч байна. Ер нь угаас манайхны цахим орчинд байдаг л нэг өнгө л дөө. Эхлээд нийтээрээ муулна. Түүний араас хэн нэг нь сайн хүн болох, бусдаасаа ялгарах ч гэдэг юм уу өмөөрөхөөр дагаад нөгөө тийш хуйларна. Яг л далайн түрлэг хад мөргөн шуугиж байснаа чимээгүйхэн буцдагтай зүйрлэж болно. Монголд нууц гэж байхгүй гэдэгчилэн сүүлдээ Ерөнхий сайдын зөвлөх А.Амундра цэцэгний эзэн байсан гээд шуугив. Эцэст нь А.Амундрагийн өмгөөлөгч цагдаагийн байгууллагад хандаж “Гэр бүлд ээдрээтэй асуудал” үүссэн гэснээр эрэл мухардалд орлоо. Гэхдээ манай чонын хийморьтой сошиалчид олж л таарна. Гэхдээ энэ бол өөр зүйл.

Харин сарнай цэцэгийн 60 саяар өөр ямар зүйлийг нуун дарагдуулж, олон нийтийн анхаарлыг өөр тийш нь эргүүлж буй бол гэсэн хар төрөөд болох биш. Дээрээс нь “Хардах эрх нь байна” гэсэн олон хүний ам тагладаг шидэт үг байгаа болохоор итгэлтэй ч хардах юм. Их наядаар тоологдох нүүрсний хулгай, Хөгжлийн банкны чанаргүй зээл гээд бидэнд мартаж болохгүй олон асуудал байгаа учраас 60-хан сая төгрөгийн сарнайгаар энэ бүгдээ мартаж болохгүйг сануулах юун.  

Эх сурвалж: Өглөөний сонин