БЗД-ийн ИТХ-ийн төлөөлөгчид Х.Нямбаатарт шаардлага хүргүүллээ

Нийслэлд БЗД-ээс 200 гаруй тэрбумыг татааст төвлөрүүлэх байсныг 3-р сарын 2-нд болсон төсвийн тодотголоор дахин ₮27 тэрбумыг нэмж төвлөрүүлэхээр баталжээ.

Үүнтэй холбогдуулан БЗД-ийн ИТХ-ын төлөөлөгчид болон иргэдийн төлөөлөл хотын дарга Х.Нямбаатарт шаардлага хүргүүллээ. 

Энэ үеэр "Сүүлийн жилүүдэд БЗД-ийн нийслэлд төвлөрүүлэх татаас жилээс жилд нэмэгдсэн. 2022 онд 91 тэрбум байсан бол 2026 онд 214 тэрбум төгрөгийн татаасыг бид нийслэлд төвлөрүүлэхээр болчхоод байна. БЗД бусад дүүргүүдээ бодвол 43 хувиар нэмэгдсэн татаасыг нийслэлд өгөх болоод байна.

Бид дээрээс ирсэн шаардлагыг биелүүлэлгүй яахав. Гэхдээ тэр хэмжээгээрээ бүтээн байгуулалтын ажил хийгдсэн бол бид юм ярихгүй. Гэтэл бид дүүрэгтээ бүтээн байгуулалтын ажил хийж чадахгүй байна. Энэ нь БЗД-т амьдарч байгаа 500 мянган иргэний эрх ашиг зөрчигдөж байгаа үйлдэл учраас бид шаардлага хүргүүлж байна.

ИТХ-ээр сонгогдсон гишүүд иргэддээ очоод хэлэх үггүй болоод байна. Нийслэл дээрээс татаас аваад байна гээд гомдоллоод суух эрх бидэнд байхгүй. Бид шаардлагатай бол дараагийн арга хэмжээг авна. БЗД-ийн 500 мянган иргэний эрх ашгийг яагаад уландаа гишгээд байгаа юм бэ? Энэ хүн гарч ирээд тайлбараа өгөх ёстой" гэлээ.