“Зэс эрдэнийн хувь” компани хөлсний жагсагчдаа солилоо

“Зэс эрдэнийн хувь” компанийн хувьцаа эзэмшигчид хэмээн өөрсдийгөө нэрлэсэн хэсэг бүлэг иргэд гуравдугаар сараас хойш Хот байгуулалт, барилга, орон сууцжуулалтын сайд Э.Бат-Амгаланг огцрохыг шаардан жагссан. Гэвч эдгээр хүмүүс бол үнэн хэрэгтээ хувьцаа эзэмшигчид биш.

Нэг өдрийн гурван сая төгрөгөөр цалинжиж буй “хөлсний жагсагчид” гэдгийг хэвлэл мэдээллийн хэрэгслүүд баримттай мэдээлж, олон нийтэд хүргэсэн билээ.

Сануулахад, жагсагчдын байрлаж буй “Dream” зочид буудалд очсон сэтгүүлчийн асуултад тэд “Зэс эрдэнийн хувь” компанитай холбоогүй. Дорноговь аймгаас ирсэн хөдөөний хүмүүс” гэж хариулсан ч өнгийн хувцасаар жигдэрч, ордны гадна суугчид мөн гэдэг нь царай зүс, зураг хөргөөрөө батлагдсан байдаг.

Тэгвэл ийнхүү “гэрэл цохигдож, олонд танигдсан” жагсагчдыг орон нутаг руу нь буцааж, захиалагч нар хүмүүсээ шинэчлэн өнөөдрийн /2026.04.13/ жагсаалыг эхлүүллээ. Жагсаал зохион байгуулагчид өчигдрөөс эхлэн үйлдвэрийн ажилчдыг Улаанбаатар хот руу жагсаалд оролцуулахаар зөөж эхэлсэн гэх эх сурвалжийн мэдээлэл байна. Түүнчлэн өнөөдөр аймгаас нааш гурван автобус “хөлсний жагсагчид” гаргахаар төлөвлөсөн гэх бөгөөд тэдгээр жагсагчдыг хотын захаар тараан байршуулж, цалинжуулж байгаа ажээ.