С.Наранд “хайртай, “Киви”-д дургүй шүүгч

Монголын рок попын ертөнцтэй ажил, амьдралаа холбосон хөгжмийн найруулагч Рагу дуучин С.Наранг шүтэн биширдэг болохоо хаана ч нуудаггүй. Жинхэнэ нэр нь Рагураман гэдэг ч тэрбээр манай урлагийнханд Рагу нэрээрээ танил болсон гэхэд хилсдэхгүй. Хөгжмийн наадмын шүүгчээр ажиллахдаа олон хүнийг баярлуулж, гомдоосон Рагу дуучин С.Наранд “хайр” зарладаг шигээ “Киви” хамтлагийнханд дургүй гэдгээ ч нуудаггүй.

“Би Монгол хүн биш. Энэ миний газар нутаг ч биш. Гэхдээ би 40 настай мөртлөө ийм мундаг дуулдаг эмэгтэйг үзээгүй. С.Наран шиг чадалтай дуучин манай Сингапурт ч байхгүй. Ёстой л, жинхэнэ Монгол мэдрэмж, дуучин хүний зүрх сэтгэл түүнд бий” гэж ирээд л урмын үг хайрлаагүй тэрбээр шинэ цомгийнх нь дуунуудыг бичиж байхдаа С.Наранд хайр зарлах дөхсөн гэдэг. Өдгөө 40 насны босго шүргэж яваа дуучин бүсгүйн хоолойны цар хүрээ, авьяас чадвар “бүлтгэр” Рагуг бишрүүлсэн нь бараг анхны тохиолдол гэсэн шүү. Мань эр ч дуучин бүсгүйд “хайр” зарласан шигээ “Киви” хамтлагийнханыг муулаад авсан удаа бий. Хатуухан шүүгчийн ганц хүсэл нь “Киви”-гийн охидыг “амьдаар” дуулахыг харах гэсэн. Ингэж хэлснээсээ болоод тус хамтлагийн продюссер Б.Ангирмаатай “чимээгүй дайн” зарласан гэдэг юм билээ.

С.Цахиур