ФАТФ-ын ерөнхийлөгч Сянмин Лью баасан гарагийн 18:00 цагт мэдээлэл хийнэ

Монгол Улс Мөнгө угаахтай тэмцэх санхүүгийн арга хэмжээ авах олон улсын байгууллага буюу ФАТФ-ын саарал жагсаалтад орлоо, ороогүй гэх албан бус мэдээллүүд сошиалаар цацагдаж байна. Тэгвэл Төв банкны зүгээс ФАТФ баасан гарагт буюу энэ сарын 18-ны өдөр албан ёсны мэдээлэл хийхдээ шийдвэрээ танилцуулна гэсэн мэдээллийг өгч байна. Мөн ийм мэдээллийг Сангийн сайд Ч.Хүрэлбаатар өнөөдөр /2019.10.16/ өгснийг сануулъя.

ФАТФ ээлжит хуралдаанаа  энэ  сарын 13-18-ны өдрүүдэд Францын нийслэл Парис хотноо хийж буй. Энэ удаагийн ээлжит  “долоо хоног”-ийн хуралдаанаар олон асуудал хэлэлцэхийн нэг нь Монгол Улсыг саарал жагсаалтад оруулах эсэх тухай юм.

ФАТФ-ын ерөнхийлөгч  Сянмин Лью нэгдсэн хуралдааны үр дүнгийн талаар хэвлэлийн бага хурлыг баасан гараг буюу 18-ны өдөр Монголын цагаар 18:00 цагт хийх урьдчилсан товтой байна.

МОНГОЛ УЛС “СААРАЛ ЖАГСААЛТ”-Д ОРВОЛ ЯМАР ЭРСДЭЛҮҮД ҮҮСЭЖ БОЛЗОШГҮЙ ВЭ?
 

• Гадаадын банк санхүүгийн байгууллагууд Монгол Улстай корреспондент банкны харилцаагаа таслах
   
• Монгол Улсын банкуудын гадаад дахь төлбөр тооцооны дансдыг хаах, улмаар гадаад гүйлгээ хийх зардал огцом өсөх, гүйлгээний саатлууд үүсэх
   
• Иргэд, аж ахуйн нэгжүүдийн гадаад гүйлгээ олон дамжуулагч банкаар дамжих ба гүйлгээний хугацаа удаашрах
   
• Ам.долларын картын төлбөр тооцоо зогсох
   
• Хөрөнгө оруулагчид, түншүүдийн итгэл буурах
   
• Гадаад худалдааны санхүүжилт зогсох, гадаадын шууд болон шууд бус хөрөнгө оруулалт эрс буурах
   
• Улсын зээлжих зэрэглэл буурах зэрэг эрсдэл үүсч болзошгүй бөгөөд энэ нь Монгол Улсын эдийн засгийн өсөлтөд сөрөг үр дагавруудыг бий болгох зэрэг эрсдэлүүд байдаг.