Диско баараар үйлчлүүлэхэд коронавирусээр өвчлөх эрсдэл МАШ ӨНДӨР

Э.Мөнхжин | Zindaa.mn
2020 оны 07 сарын 23

“Ковид-19”-ийн тандалт, судалгааны тойм мэдээллийг Эрүүл мэндийн яамнаас өгч байна.

 

  • АНУ-ын Жонс Хопкинсийн их сургуулийн эрдэмтэд “Ковид-19”-ийн тархалтад хүн хоорондын зай барих арга хэмжээний нөлөөллийг судалжээ. 26 мужийн өвчлөлийн мэдээлэлд дүн шинжилгээ хийхэд 20 мужид хүн амын хөдөлгөөн багассанаар халдварын тохиолдол буурч байгааг тогтоожээ. Энэхүү судалгаа нь “Ковид-19”-ийг бууруулах үр дүнтэй арга бол зай барих гэдгийг баталсан бөгөөд коронавирусний эсрэг вакциныг өргөн хүрээнд хийх хүртэл хэрэгжүүлсээр байх шаардлагатайг эрдэмтэд зөвлөжээ.

 

  • Испани улсын эрдэмтэд нийт хүн амын дундах “Ковид-19”-ийн эсрэг сүргийн дархлааг тодорхойлох зорилгоор 35,883 айл өрхийг санамсаргүй түүврийн аргаар сонгон авч судалжээ. Судалгаагаар нийт хүн амын  таван хувьд нь эсрэг бие үүссэн ба “Ковид-19”-ийн эсрэг бие илэрсэн ч дахин халдварлахгүй гэх баталгаагүй, эсрэг бие хэдий хугацаанд хамгаалдаг нь тодорхой бус байна гэж эрдэмтэд үзжээ. Тиймээс ч цар тахлын дараагийн давалгаанаас сэргийлэхийн тулд нийгмийн эрүүл мэндийн арга хэмжээг тогтмол хэрэгжүүлэх хэрэгтэйг онцолжээ.

 

  • Герман, Австрали зэрэг орны эрдэмтэд олон улсын аялал жуучлал болон цар тахлын хамаарлыг судалсан эдийн засгийн судалгаагаар жуулчдын тоо дунджаар нэг хувиар нэмэгдэхэд Коронавируст халдвар авсан иргэд 1.2 хувиар, нас баралт 1.4 хувиар ихсэж байна гэсэн тооцоолол гарчээ.

 

  •  Иран улсын Техран анагаах ухааны их сургуулийн эрдэмтэд “Ковид-19” зөвхөн уушгийг өвчлүүлээд зогсохгүй бүдүүн, нарийн гэдэс, элэг, бөөр, арьс, зүрх, цөс, тархи зэрэг бусад эрхтэнүүдийг гэмтээдэг болохыг тогтоожээ. Зарим эмгэг өөрчлөлтүүд нь САРС, МЕРС өвчний шинж тэмдэгтэй давхцаж байгаа бөгөөд судлаачид эмчлэгч эмч нар анхаарах шаардлагатай гэж зөвлөжээ.

 

  • Их Британий Кембриджийн их сургуулийн эрдэмтэд “Ковид-19”-тэй эхээс төрсөн 58 нярайн дөрвөн буюу 6.8 хувь нь халдвар авсныг баталжээ. Төрсөнөөс хойш 1-2 өдрийн дараа шинжилгээ авсан тул төрсний дараа халдвар авсан байх магадлалтай гэж үзжээ. Халдвартай эхийн эхэс болон сүүнээс коронавирус илрээгүй байна.

 

  • Япон улсын эрдэмтдийн хийсэн голомтын судалгаагаар диско баараар үйлчлүүлэхэд коронавируст халдварт өртөх эрсдэл хамгийн өндөр байжээ. Учир нь хүн хоорондын зай барих ямар ч боломжгүй, хүмүүс маш ойрхон зайнаас харьцдаг, харанхуй, бүгчим зэрэг нь халдвар амархан тархахад нөлөөлж байна гэжээ.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top